سەنات دەپۋتاتى تالعات مۇساباەۆ تٸلشٸلەرگە قىزىلوردا وبلىسىندا تٸكۇشاق اپاتىنىڭ مەن-جايىن ايتىپ بەردٸ, دەپ حابارلايدى قازاقپارات تٸلشٸسٸ.
«قورعانىس مينيسترلٸگٸنٸڭ ٶتكٸزگەن ارنايى جاتتىعۋى اياسىندا تٸكۇشاق ەۋەگە كٶتەرٸلگەن. بۇل توپ اقتاۋدان شىمكەنتكە قاراي باعىت العان, سونداي-اق ونىڭ وسى ارالىقتا بەينەۋدە, كەيٸننەن «كراينيي» (بايقوڭىر) ەۋە ايلاعىندا قونۋى جوسپارلانعان. بايقوڭىردان ۇشىپ شىققاننان سوڭ بٸرنەشە مينۋتتان كەيٸن ديسپەتچەرلٸك قىزمەتتٸڭ راديولوكاتورلارىنداعى تٸكۇشاقتىڭ بەلگٸسٸ جوعالىپ كەتكەن. كەيٸننەن تٸكۇشاقتىڭ اپات بولعانى انىقتالدى», - دەدٸ تالعات مۇساباەۆ سەناتتىڭ جالپى وتىرىسىنان كەيٸن تٸلشٸلەردٸڭ ساۋالىنا جاۋاپ بەرە وتىرىپ.
سونىمەن قاتار تٸكۇشاقتىڭ ۇشۋى قيىن مەتەورولوگييالىق جاعدايدا ٶتكەنٸن اتاپ ٶتتٸ.
«بۇل كٷردەلٸ ەۋە ساپارى ەرەكشە تاڭبا قالدىرادى. مەن ونى ۇشقىش رەتٸندە ايتىپ وتىرمىن. وسىنداي قيىن جاعدايدا ۇشۋ قانداي اۋىرتپالىق تٷسٸرەتٸنٸن جاقسى بٸلەمٸن. ەكيپاج بارلىق قاجەتتٸ شارانى قابىلدادى. تەحنيكانىڭ ٶزٸندٸك ەرەكشەلٸگٸ بار, ياعني اۆياتسييا - ول ەڭ قيىن كٶلٸكتٸڭ تٷرٸ. سوندىقتان مۇنداي وقيعالار ەكيپاجعا بايلانىستى ەمەس قايعىلى وقيعالار بولادى», - دەدٸ سەناتور.
وسى ورايدا ول قىلمىستىق ٸس اياسىندا ەرەكشە تەرگەۋ امالدارى جٷرگٸزٸلەتٸنٸن, قورعانىس مينيسترلٸگٸنٸڭ ارنايى كوميسسيياسى جۇمىس ٸستەپ جاتقاندىعىن اتاپ ٶتتٸ.
ەسكە سالا كەتسەك, قر ٸٸم تجك باسپاسٶز قىزمەتٸ بۇعان دەيٸن قىزىلوردا وبلىسىنىڭ جالاعاش اۋدانىندا مي-8 تٸكۇشاعى اپاتقا ۇشىراعانىن حابارلاعان بولاتىن.
اپات سالدارىنان تٸكۇشاق بورتىنداعى 13 ادام قازا تاپتى.
