كٶپتەگەن ادام سمارتفونىن ۇيىقتار الدىندا قۋات كٶزٸنە قوسىپ, تاڭەرتەڭ اجىراتادى. بٸر قاراعاندا ٷيرەنشٸكتٸ ەرەكەت بولىپ كٶرٸنگەنٸمەن, زاريادتاۋ كەزٸندە قاۋٸپسٸزدٸك تالاپتارى ساقتالماسا, قۇرىلعىنىڭ قىزىپ كەتۋ قاۋپٸ بار. ەسٸرەسە ساپاسىز زاريادتاعىشتار مەن اقاۋلى اككۋمۋلياتورلار ٶرت شىعۋ ىقتيمالدىعىن ارتتىرادى, دەپ حابارلايدى ult.kz.
Malim.kz باسىلىمىنىڭ جازۋىنشا, بٷگٸندە تەلەفوندى تەك بايلانىس قۇرالى رەتٸندە ەمەس, جۇمىس ٸستەۋ, تٶلەم جاساۋ, اقپارات الۋ جەنە كٷندەلٸكتٸ شارۋالاردى ۇيىمداستىرۋ ٷشٸن پايدالانامىز. سوندىقتان ونىڭ قۋاتىنىڭ تاۋسىلماۋى كٶپشٸلٸك ٷشٸن ماڭىزدى.
الايدا قۇرىلعىنى زاريادتاۋدىڭ دا ٶز ەرەجەلەرٸ بار.
تٷندە زاريادتاۋ قانشالىقتى قاۋٸپتٸ?
قازٸرگٸ سمارتفونداردىڭ كٶپشٸلٸگٸندە اككۋمۋلياتوردىڭ شامادان تىس زاريادتالۋىنا جول بەرمەيتٸن قورعانىس جٷيەلەرٸ ورناتىلعان.
سوندىقتان ساپالى ەرٸ اقاۋسىز قۇرىلعىنى تٷندە زاريادتاۋ مٸندەتتٸ تٷردە ٶرتكە ەكەلەدٸ دەۋگە بولمايدى.
دەگەنمەن ادام ۇيىقتاپ جاتقاندا اقاۋلى زاريادتاعىشتىڭ قىزعانىن, اككۋمۋلياتوردان تٷتٸن شىققانىن نەمەسە باسقا قاۋٸپتٸ بەلگٸلەردٸ دەر كەزٸندە بايقاماۋى مٷمكٸن.
وسى سەبەپتٸ تەلەفوندى مٷمكٸندٸگٸنشە ادام باقىلاپ وتىرعان ۋاقىتتا زاريادتاعان دۇرىس.
ەگەر قۇرىلعىنى تٷندە قۋاتتاۋ قاجەت بولسا, ونى تٶسەك ٷستٸنە ەمەس, قاتتى ەرٸ جانبايتىن بەتكە ورنالاستىرۋ ماڭىزدى.
زاريادتاۋ كەزٸندە جيٸ جٸبەرٸلەتٸن قاتەلٸكتەر
ەڭ كەڭ تارالعان قاتەلٸكتٸڭ بٸرٸ – تەلەفوندى جاستىقتىڭ استىنا قويۋ.
بۇل كەزدە قۇرىلعىدان بٶلٸنەتٸن جىلۋ سىرتقا دۇرىس تاراماي, تەمپەراتۋرا كٶتەرٸلۋٸ مٷمكٸن.
تاعى بٸر قاۋٸپتٸ ەرەكەت – زاقىمدالعان نەمەسە ساپاسى كٷمەندٸ زاريادتاۋ سىمىن پايدالانۋ.
سىمنىڭ سىرتقى قاپتاماسى جىرتىلىپ, ٸشكٸ بٶلٸكتەرٸ كٶرٸنٸپ تۇرسا, ونى دەرەۋ اۋىستىرعان جٶن.
سونىمەن قاتار تەلەفوندى جىلىتقىشتاردىڭ قاسىنا قويۋعا, تٸكەلەي كٷن سەۋلەسٸنٸڭ استىندا زاريادتاۋعا بولمايدى.
ال قاتتى قىزىپ كەتكەن قۇرىلعىنى توڭازىتقىشقا نەمەسە مۇزداتقىشقا سالۋ دۇرىس شەشٸم ەمەس. تەمپەراتۋرانىڭ كٷرت ٶزگەرۋٸ جەنە ىلعالدىڭ پايدا بولۋى ەلەكترونيكانى زاقىمداۋى مٷمكٸن.
تەلەفون قاتتى قىزىپ كەتسە نە ٸستەۋ كەرەك?
الدىمەن تەلەفوندى پايدالانۋدى توقتاتىپ, قاۋٸپسٸز بولسا, زاريادتاعىشتان اجىراتۋ قاجەت.
قۇرىلعىنىڭ قالىپتى تەمپەراتۋراعا دەيٸن سۋۋىنا مٷمكٸندٸك بەرگەن جٶن.
ەگەر سمارتفوننىڭ كورپۋسى ٸسٸنٸپ, كٷيٸك يٸسٸ شىقسا نەمەسە ەدەتتەن تىس دىبىستار ەستٸلسە, ونى قايتا قوسۋعا بولمايدى.
مۇنداي جاعدايدا قۇرىلعىنى ماماندارعا كٶرسەتكەن دۇرىس. زاقىمدالعان اككۋمۋلياتوردى تەك تيٸستٸ بٸلٸكتٸلٸگٸ بار ماماندار اۋىستىرۋى كەرەك.
پاۋەربانككە دە وسىنداي تالاپتار قويىلادى
پورتاتيۆتٸ زاريادتاۋ قۇرىلعىلارىنىڭ ٸشٸندە دە ەنەرگييا جيناقتايتىن اككۋمۋلياتورلار ورنالاسقان.
ولاردى سوققىدان, قاتتى قىسىمنان جەنە جوعارى تەمپەراتۋرادان قورعاۋ قاجەت.
پاۋەربانك ٸسٸنسە, قاتتى قىزسا نەمەسە تٷتٸندەي باستاسا, ونى پايدالانۋدى جالعاستىرۋعا بولمايدى.
بٷلٸنگەن اككۋمۋلياتوردى كەدٸمگٸ تۇرمىستىق قوقىسقا تاستاماي, ارنايى قابىلداۋ ورىندارىنا ٶتكٸزگەن جٶن.
ٶرت شىقسا نە ٸستەۋ قاجەت?
ەگەر تەلەفوننان تٷتٸن شىعىپ نەمەسە جالىن پايدا بولسا, ادامداردى قاۋٸپسٸز جەرگە شىعارىپ, ٶرت سٶندٸرۋ قىزمەتٸن شاقىرۋ كەرەك.
جانىپ جاتقان قۇرىلعىنى قولعا ۇستاپ تاسىمالداۋعا نەمەسە ونىڭ كورپۋسىن اشۋعا بولمايدى.
قازاقستاندا مۇنداي جاعدايدا 101 نەمەسە 112 نٶمٸرٸنە قوڭىراۋ شالۋعا بولادى.
تەلەفوندى دۇرىس زاريادتاۋ, ساپالى قۇرىلعىلاردى پايدالانۋ جەنە اككۋمۋلياتوردىڭ جاعدايىن باقىلاۋ – كٷندەلٸكتٸ قاۋٸپسٸزدٸكتٸڭ قاراپايىم, بٸراق ماڭىزدى بٶلٸگٸ.
