Almaty oblysynda jalǵyzbasty keiýanaǵa jasalǵan qaraqshylyq shabýyl faktisi ashyldy, dep habarlaidy Polisia.kz saity.
Talǵar APB kezekshi bólimine Talǵar qalasynyń 78 jastaǵy turǵynynyń úiine belgisiz bireýdiń basyp kirip, pyshaqpen qorqytyp, aqshasyn tartyp áketkeni týraly habarlama kelip túsken. Shyǵyn somasy 100 myń teńgeni qurady.
«Oqiǵa ornyna sanaýly minýttarda jetken Talǵar APB patrýli jábirlenýshiden qylmyskerdiń syrtqy kelbeti týraly surastyryp, izdeýge kirisken. 30 minýttan keiin patrýldik politsiia qyzmetkerleri minez-qulqy kúdik týdyratyn, butalar arasynda jasyrynǵan, jábirlenýshi sipattaǵan adamǵa uqsaityn er adamdy ustady. Onyń qaltasynan bir býma aqsha tabyldy», – dedi Talǵar APB bastyǵy Erlan Qasym.
Óziniń is-áreketin moiyndaǵan kúdiktiden jaýap alý kezinde politseiler egde áielge shabýyl jasaý dereginiń mán-jaiyn tolyq anyqtady.
«Jumyssyz kúdikti qalany maqsatsyz aralap júrip, jalǵyzbasty ájeidiń aqshasyn tartyp alýǵa bel bailaǵan. Ózin eshkim kórmeýi úshin úige artqy jaqtaǵy qorshaý arqyly kirgen. As úi pyshaǵymen zeinetkerdi qorqytyp, odan aqsha talap etken. Qoryqqan ájei oǵan 500 teńge usynǵan. Usynylǵan aqshaǵa kóńili tolmaǵan kúdikti ájeidi kúsh qoldanamyn dep qorqytyp, barlyq aqshasyn berýdi talap etken. Ájei qoryqqannan ámiianyn alyp shyqqan. Ustalǵan adam ámiiannan barlyq aqshany alyp, izin sýytqan. Jarty saǵattan keiin kúdikti ustaldy», – dep tolyqtyrdy Erlan Qasym.
Qazirgi ýaqytta bul fakt boiynsha QR Qylmystyq kodeksiniń 192-babymen (Qaraqshylyq) tergeý amaldary júrgizilýde.
