instagram/taldykorganec_kolesa
Taldyqorǵanda 20 jastaǵy stýdent Jáńgir Nurlanuly fýtbol matchyn kórgennen keiin qaza tapty. Qaiǵyly oqiǵa 7 mamyr kúni bolǵan, dep habarlaidy Ult.kz taldykorganec_kolesa-ǵa silteme jasap.
Marqumnyń anasynyń aitýynsha, uly sol keshte dostarymen birge fýtbol kórýge ketken. Jastar jinalǵan páterde shamamen on adam bolǵan, olardyń arasynda 17 jastaǵy mektep oqýshysy da júrgen.
Aldyn ala málimet boiynsha, otyrys barysynda jastar arasynda janjal týyndaǵan. Keiin olar syrtqa shyǵyp, biraz ýaqyttan soń qaita kezdesken. Anasynyń sózinshe, sol kezde mektep oqýshysy Jáńgirdi syrtqa shaqyryp alyp, oǵan alty jerden pyshaq jaraqatyn salǵan. Stýdent alǵan jaraqattarynan kóz jumdy.
Áieldiń aitýynsha, oqiǵaǵa deiin az ýaqyt buryn ulymen beineqońyraý arqyly sóilesken. Ol kezde Jáńgirdiń kóńil kúii jaqsy bolyp, qaljyńdap sóilesken ári keiin qaita habarlasatynyn aitqan.
Qazir qylmystyq is boiynsha tergeý júrip jatyr. Saraptamalar taǵaiyndalyp, kýágerlerden jaýap alynýda. Marqumnyń týystary ádil tergeý júrgizilip, kináli adamnyń qatań jazalanýyn talap etýde.
Jetisý oblystyq politsiia departamenti kúdiktiniń ustalyp, ýaqytsha ustaý izoliatoryna qamalǵanyn málimdedi. Sot oǵan qatysty kúzetpen ustaý túrindegi bultartpaý sharasyn sanktsiialaǵan.
Politsiia ókilderiniń málimetinshe, oqiǵanyń barlyq mán-jaiyn anyqtaýǵa baǵyttalǵan keshendi tergeý amaldary júrgizilip jatyr. Is oblystyq politsiia departamenti basshylyǵynyń baqylaýyna alynǵan.
