Syrdariia aýdanynyń 90 jyldyǵyna arnalǵan merekelik respýblikalyq aqyndar aitysy ótti. Jyr dodasyna Astana qalasynan Erkebulan Qainazarov, Meiirbek Sultanhan, Almaty qalasynan Shuǵaiyp Sezimhan, Qaraǵandydan Maqsat Aqanov, Batys Qazaqstan oblysynan Jansaia Mýsina, Túrkistan oblysynan Anar Japparqulova, Aqtóbeden Álihan Jaqsylyq, Qyzylordadan Erjeńis Ábdiev, Jalaǵash jáne Syrdariia aýdanynan Muhtar Niiazov pen Nurmat Mansurov qatysty.
Kil júirik jiylǵan jyr dodasyn belgili aqyn Júrsin Erman júrgizdi. Ulttyq ónerge balanǵan aitysqa Qazaqstannyń eńbek sińirgen qairatkeri E.Ábdihalyqova, aqyndar A.Áltaev, Z.Ibadýllaev, Q.Esimseiitova jáne filologiia ǵylymdarynyń kandidaty Ǵ.Tuiaqbai tórelik etti.
– Aitys – mádenietimizdi aishyqtaityn, – atadan balaǵa miras bolyp kele jatqan kieli óner. Tarih qoinaýynan úzilmei kele jatqan tól ónerimiz sharalar aiasynda eshqashan óshpeidi. Óitkeni onyń tyńdaýshysy da, baǵasyn berip tórelik aitýshysy da qarapaiym halyq. Mine, búgin ahýndar men aqyndardyń ólkesinde dúbirli sát. Aityskerlerdiń arqaly dúniesi sizderge arnalady, – dedi J.Erman.
Aqyndar alqa toptyń aldynda aianyp qalǵan joq. Tushymdy sózder, oraily oilar eldiń júregine jetip, rýhyn oiatty, namysyn qyzdyrdy. Oidyń parqy, sózdiń narqy artty, aitys tili aishyqtana tústi. Shyn júirikke tusaý joq eken. Qazylar alqasynyń bir aýyzdy uiǵarymymen sóz dodasynyń bas júldesin Nurmat Mansurov enshilep, jeńil avtokólikti ielendi. Júldeli I oryn Batys Qazaqstan oblysynyń namysyn qorǵaǵan Jansaia Mýsinaǵa, II oryn astanalyq Meiirbek Sultanhanǵa, III oryn Muhtar Niiazovqa buiyrdy. Sonymen qatar, qatysýshy aqyndardyń barlyǵyna yntalandyrý syilyǵy berildi.
Aýdan mereitoiymen qatar halyq jazýshysy Qaltai Muhamedjanov pen kórnekti aqyn Ábirásh Jámishevtiń 90 jyldyǵy atalyp ótti. «Qalamy qarymdy tulǵalar» atty ádebi keshtiń ashylýynda Ábirásh Jámishevtiń uly Talǵat el azamattaryna alǵysyn bildirdi.
– Aýdannyń mereitoiymen qatar biyl qos qalamgerdiń de 90 jyldyq torqaly toiy. Aiadai aýdanda týyp, elimizge tanylǵan, jerlester maqtanyshyna ainalǵan qalamgerlerge qurmet kórsetip jatqan barshańyzǵa alǵysym sheksiz. Qalamyna qut qonyp, baq daryǵan daryndy jazýshylardyń shyǵarmashylyǵyn nasihattaý, óskeleń urpaqqa úlgi etý, aýdannyń tarihy tereńde jatqanyn seziný biz úshin úlken maqtanysh, – dedi aqynnyń uly.
Keshte dańqty qalamgerlerdiń shyǵarmashylyqtary keńinen nasihattalyp, estelikter aitylyp, óleńderinen úzindi oqyldy. Aqyndar S.Ospan, J.Dáribaeva, jýrnalist-etnograf T.Dairabaev, Qorqyt ata atyndaǵy QMÝ professory Q.Qudaibergenov qalamgerler jaily tolǵanystaryn jetkizdi.
Ádebi kesh sońynda Q.Muhamedjanovtyń «Bóltirik bórik astynda» atty spektakli sahnalandy. Teatr ártisteri qoǵamdaǵy bilimsizdik, mansapqorlyq, ulttyq ádet-ǵuryp, ana tilinen beziný siiaqty keleńsizdikterdi ashy kúlkimen jetkize bildi. Talǵamdy kórermender qoiylymdy joǵary baǵalady.
Jalpy, aýdandyq mádeniet úiiniń ónerpazdary atalǵan qoiylymmen birneshe ret oblystyq deńgeidegi baiqaýlarǵa qatysyp, jeńimpaz atanyp júr. Bul óner men mádeniet salasyna baǵyttalyp jatqan aýqymdy qoldaýlardyń jemisi.
Aýdan jastary óńirden shyqqan tanymal tulǵalarmen kezdesti. Olardyń qatarynda «Qurmet» ordeniniń iegeri aqyndar Seifolla Ospan, Qaiyrbek Asanov, táýelsiz Qazaqstannyń alǵashqy ánurany avtorlarynyń biri Jadyra Dáribaeva, Qorqyt ata atyndaǵy QMÝ professory Qazybai Qudaibergenov, professor Ábdijálel Bákir jáne qoǵam qairatkeri Almagúl Bojanova bar.
Kezdesýde ataqty tulǵalar jastarǵa tálimdi áńgimeler aityp, ómirbaiandarynan syr shertti. Jetistikke jetý úshin eń birinshi bilim, izdenis jáne adal eńbek kerek ekenin aitqan daryndy tulǵalar jastardy kóp oqýǵa, bos ýaqyttaryn tiimdi paidalanýǵa shaqyrdy.
Mereitoi barysynda ortalyq stadionda teatrlandyrylǵan kórinis, gala-kontsert uiymdastyryldy. Osy sharada aýdan ákimi Ǵ.Qazantaev metsenattyq tyń ideialardy júzege asyrǵan eljandy azamattarǵa «Jomart júrek» syilyǵyn tabystady.
Atap aitqanda, aýdannyń áleýmettik-ekonomikalyq damýyna erekshe úles qosqan «Aqjarma jáne K» sharýa qojalyǵynyń tóraǵasy Q.Nurseiitov «Jyl metsenaty» nominatsiiasymen marapattaldy. Al, egin sharýashylyǵy salasynda jemisti eńbek etip, aýyl azamattaryn turaqty jumyspen qamtyǵan «A.Toqmaǵanbetov LTD» JShS direktory M.Esjanov «Týǵan ólke» atalymyn ielendi. Sonymen qatar, S.Seifýllin aýylyna jańa meshit ashanasynyń salynýyna, qoǵamdyq monshanyń ashylýyna septigin tigizgen «Qundyzdy mai» sharýa qojalyǵynyń tóraǵasy B.Rahmetke «Jyl tulǵasy» nominatsiiasy berildi. «Jyldyń úzdik uiymy» – «Syrdariia aýdanynyń áielderi» qoǵamdyq birlestigine, «Eren eriktilik» nominatsiiasy «Syrdariia aýdandyq jastar resýrstyq ortalyǵyna» berildi.
Kesh sońy Qazaqstan estrada juldyzdarynyń qatysýymen gala kontsertpen jalǵasyp, lazerlik shoý men otshashýǵa ulasty.
Sóitip, Tereńózek topyraǵy at dúbirimen túlep, tabysty óńir toiy jańa jobalarmen, appaq armandarmen sabaqtasyp jatty.
