Búgin Qazaq ulttyq sport ýniversitetinde (KNUS) oqý ornynyń tarihyndaǵy jańa kezeńge arnalǵan saltanatty jiyn ótti. Ýniversitettiń negizin qalaýshy Nurasyl Medeý bilim ordasyn memleketke óteýsiz berý týraly sheshimin resmi túrde jariialady, dep habarlaidy ult.kz.
Saltanatty shara ýniversitettiń bes jyl ishinde qalyptasyp, damý jolynan ótken kezeńin qorytyndylap, jańa beleske qadam basýyn aiqyndady. 2021 jyly nebári 150 stýdenti bar shaǵyn akademiia retinde qurylǵan oqý orny búginde bes myńǵa jýyq stýdent bilim alatyn, ǵylym men bilimdi ushtastyrǵan biregei keshenge ainaldy.
«2021 jyly Dene shynyqtyrý jáne buqaralyq sport akademiiasyn ashqan kezde Qazaqstanda álemdik deńgeidegi sport ýniversitetin qurýdy armandadym. Jastar óz qabiletterin shyńdap, halyqaralyq talaptarǵa sai sapaly bilim alyp, ǵylymmen ainalysyp, úlken sportta jetistikterge jete alatyn bilim ordasyn qalyptastyrǵym keldi»,– dedi Nurasyl Medeý.
Bes jyl ishinde KNUS ózindik bilim berý jáne ǵylymi ekojúiesin qalyptastyryp, jańa bilim berý baǵdarlamalaryn iske qosty jáne birqatar halyqaralyq jobany júzege asyrdy.
Ýniversitettiń mańyzdy jetistikteriniń qatarynda Halyqaralyq kibersport federatsiiasymen birlesken kibersport zerthanasynyń ashylýy, Qytaidyń «Sinhýa» aqparat agenttiginiń qatysýymen Sport Media Lab zerthanasynyń qurylýy, RITA halyqaralyq jobasy aiasynda Qutqarý sporty ortalyǵynyń ashylýy, sondai-aq Dúniejúzilik dopingke qarsy agenttikpen (WADA) yntymaqtastyq negizinde Ortalyq Aziianyń bilim berý habynyń qurylýy bar.
Halyqaralyq yntymaqtastyq aiasynda Halyqaralyq Olimpiada komitetimen birlesip Olimpiadalyq zertteýler, bilim berý jáne mura ortalyǵy ashyldy. Sonymen qatar Vengriianyń Sport jáne ǵylym ýniversitetimen birlesip sporttaǵy ozyq tájiribe men turaqty damý ortalyǵy quryldy. «BUU-Áielder» qurylymynyń (UN Women) qoldaýymen Women in Sport Kazakhstan jobasy júzege asyrylýda.
Ýniversitet damýynyń mańyzdy baǵyttarynyń biri – halyqaralyq akademiialyq utqyrlyqty keńeitý. KNUS sheteldik joǵary oqý oryndarymen qos diplomdy bilim berý baǵdarlamalaryn iske asyrý jóninde kelisimder jasady. Eclore Business School oqý ornymen yntymaqtastyq aiasynda alǵashqy 20 magistrant qos diplom iegeri atandy. Qazirgi ýaqytta Shvetsiia, Koreia Respýblikasy, Italiia jáne Polsha ýniversitetterimen osyndai baǵdarlamalardy damytý jumystary jalǵasyp jatyr.
Qazaq ulttyq sport ýniversiteti sapaly bilimniń qoljetimdi bolýyna erekshe mán beredi. Osy maqsatta Nurasyl Medeý taǵaiyndaǵan Life Chance Grant jáne Merit Grant granttary talantty jastarǵa, ásirese shalǵai aýyldardan shyqqan talapkerlerge, bilim alyp, óz múmkindikterin tolyq júzege asyrýǵa jol ashyp otyr.
Merit Grant granty oqý aqysynyń tolyq qunyn óteidi. Al Life Chance Grant baǵdarlamasy oqý aqysyn tóleýmen qatar, ai saiynǵy shákirtaqyny, tálimgerlik qoldaýdy, jataqhanada turýdy jáne shetelde bilim alýdy qarjylandyrý múmkindigin qamtidy.
Ýniversitet stýdentteriniń jetistikteri de atqarylǵan jumystyń nátijesin kórsetedi. Nurasyl Medeýdiń aitýynsha, 2026 jyly Japoniiada ótken Aziia oiyndarynda Qazaqstan namysyn qorǵaǵan KNUS 17 stýdentiniń 14-i júldeger atanǵan.
«Ýniversitet degenimiz – ǵimarat pen qabyrǵalar ǵana emes. Onyń basty bailyǵy – bilikti oqytýshylar quramy, biregei bilim berý baǵdarlamalary, durys uiymdastyrylǵan oqý úderisi jáne júieli tárbie jumysy», – dep atap ótti Nurasyl Medeý.
