Qyzylordada karateden álem chempiony Móldir Jańbyrbaidyń týǵan kelini men bes ailyq jieni jol apatyna ushyrady. Sábi aýrýhanada kóz jumǵan, al anasy jansaqtaý bóliminde jatyr, dep habarlaidy ult.kz.
Sportshynyń aitýynsha, oqiǵa kezinde kelini Nargiz bes ailyq ulymen birge jol jiegimen kele jatqan. Ol jerde trotýar bolmaǵan. Osy kezde qarsy jolaqqa shyǵyp ketken kólik anasy men balany qaǵyp ketken.
Móldir Jańbyrbaidyń sózinshe, soqqydan anasy men balasy birneshe metrge ushyp ketken. Sábi asfaltqa, al anasy aryqqa qulaǵan. Balanyń basynan aýyr jaraqat alyp, aýrýhanada qaitys bolǵany aitylady.
Qazir Nargiz jansaqtaý bóliminde jatyr. Sportshynyń aitýynsha, kelini aýyr jaǵdaida bolǵandyqtan, oǵan ota jasaý ázirge múmkin bolmai otyr. Ol balasynyń qaitys bolǵanynan áli habarsyz.
Oqiǵadan keiin júrgizýshi kóligin tastap, oqiǵa ornynan qashyp ketken. Móldir Jańbyrbaidyń málimetinshe, kólikten birneshe syra bótelkesi tabylǵan. Alaida bul aqparatqa qatysty resmi rastaý ázirge keltirilmegen.
Sportshy áleýmettik jelidegi jazbasynda kúdiktiniń buryn da adam qaqqanyn jáne onyń ákesi quqyq qorǵaý organdarynda qyzmet etkenin málimdegen.
Qazirgi ýaqytta júrgizýshiniń ustalǵany týraly aqparat joq. Oqiǵanyń mán-jaiy men kúdiktini izdeý barysyna qatysty politsiianyń resmi málimeti qajet.
