Qazaqstanda 2026–2027 jylǵy qys salystyrmaly túrde jyly bolady dep kútiledi. Alaida eldiń kei óńirlerinde jaýyn-shashyn mólsheri normadan joǵary bolyp, burqasyn, kóktaiǵaq pen tuman bolýy múmkin. Bul týraly «Qazgidromet» RMK-nyń konsýltativtik maýsymdyq boljamynda aitylǵan, dep habarlaidy ult.kz.
Qarasha jyly ári jaýyn-shashyndy bolady
Qazgidromettiń aldyn ala boljamyna sáikes, 2026 jylǵy qarashada aýa temperatýrasy klimattyq normadan 2°S joǵary bolady. Sonymen qatar respýblikanyń basym bóliginde jaýyn-shashyn mol túsedi dep kútiledi.
Jaýyn-shashynnyń eń kóp mólsheri soltústik-batys, soltústik, soltústik-shyǵys jáne shyǵys óńirlerde, sondai-aq ońtústik-shyǵystyń shyǵys bóligi men taýly aýdandarda boljanyp otyr. Eldiń basym bóliginde jańbyr, qar jáne jańbyr aralas qar jaýýy múmkin. Soltústik pen shyǵysta aidyń basynan keiin negizinen qar jaýady dep kútiledi.
Qarashada tuman, kóktaiǵaq jáne ekpindi jel bolýy yqtimal. Respýblikanyń soltústik jartysynda burqasyn bolýy múmkin.
Aidyń basynda soltústik, ortalyq jáne shyǵys óńirlerde túngi aýa temperatýrasy 0…+5°S-qa, kúndiz +5…+16°S-qa deiin kóteriledi. Ońtústik pen ońtústik-shyǵysta túnde +5…+15°S, kúndiz +15…+25°S bolýy múmkin.
Al batys jáne ońtústik-batys óńirlerde túngi temperatýra 0…−7°S-qa deiin tómendep, kúndiz 0…+5°S shamasynda bolady dep boljanýda.
Aidyń ekinshi jáne úshinshi onkúndikterinde aýa temperatýrasy qubylmaly bolady. Kei kúnderi soltústik, shyǵys jáne ortalyq óńirlerde túngi aiaz −10…−18°S-qa deiin jetýi múmkin.
Jeltoqsan men qańtarda aýa raiy qandai bolady?
Maýsymdyq boljam boiynsha, 2026 jylǵy jeltoqsanda Qazaqstannyń barlyq óńirinde ortasha aýa temperatýrasy klimattyq normadan 2°S joǵary bolady dep kútiledi.
Jaýyn-shashyn mólsheri eldiń basym bóliginde normaǵa jýyq bolady. Al soltústik óńirlerde, soltústik-batys pen soltústik-shyǵystyń birqatar aýmaǵynda jaýyn-shashyn normadan joǵary bolýy yqtimal. Qyzylorda oblysynyń ońtústiginde jaýyn-shashyn mólsheri normadan tómen bolady dep boljanýda.
2027 jylǵy qańtarda respýblikanyń basym bóliginde ortasha aýa temperatýrasy klimattyq normadan 1–2°S joǵary bolýy múmkin. Degenmen Batys Qazaqstan, Atyraý, Aqtóbe, Qostanai jáne Soltústik Qazaqstan oblystarynyń basym bóliginde, sondai-aq Aqmola oblysynyń soltústik-batysynda temperatýra klimattyq norma shamasynda bolady dep kútiledi.
Qańtarda jaýyn-shashyn mólsheri eldiń basym bóliginde normaǵa sai bolady. Batys Qazaqstan oblysynyń ońtústik-batysynda, Atyraý oblysynyń batysynda jáne Mańǵystaý oblysynda jaýyn-shashyn normadan joǵary bolýy múmkin. Al ońtústik jáne ortalyq óńirlerdiń birqatar aýmaǵynda jaýyn-shashyn mólsheri normadan tómen boljanyp otyr.
Aqpanda jaýyn-shashyn kóbeiedi
2027 jylǵy aqpanda Qazaqstannyń basym bóliginde ortasha aýa temperatýrasy klimattyq normadan 1–3°S joǵary bolady dep kútiledi.
Soltústik jáne shyǵys óńirlerde, sonyń ishinde Soltústik Qazaqstan jáne Shyǵys Qazaqstan oblystarynda, Pavlodar oblysynyń basym bóliginde, Abai oblysynyń soltústik-shyǵysynda, sondai-aq Qostanai men Aqmola oblystarynyń soltústiginde temperatýra klimattyq norma shamasynda bolady.
Aqpanda respýblikanyń basym bóliginde jaýyn-shashyn mólsheri normadan joǵary bolýy yqtimal. Eldiń batys jartysynyń birqatar óńirinde jaýyn-shashyn klimattyq normaǵa sai bolady dep boljanýda. Al Mańǵystaý oblysynyń ońtústik-shyǵysynda, Aqtóbe oblysynyń ońtústiginde jáne Qyzylorda oblysynyń ońtústik-batysynda jaýyn-shashyn mólsheri normadan tómen bolýy múmkin.
Qysta temperatýra kúrt qubylýy múmkin
Qazgidromettiń konsýltativtik maýsymdyq boljamyna sáikes, 2026–2027 jylǵy qys salystyrmaly túrde jyly, al atmosferalyq jaýyn-shashyn mólsheri ortasha bolady dep kútiledi. Degenmen soltústik-batys, soltústik, soltústik-shyǵys óńirlerdiń jekelegen aýdandarynda jáne Ortalyq Qazaqstanda jaýyn-shashyn normadan joǵary bolýy yqtimal.
Qys boiy kei jerlerde burqasyn, ekpindi jel, kóktaiǵaq pen tuman boljanyp otyr. Aýa temperatýrasynyń kúrt ózgerýi qar jamylǵysynyń ishinde muz qabatynyń túzilýine yqpal etýi múmkin.
Aita keteiik, maýsymdyq boljam konsýltativtik sipatqa ie. Naqty kúnderdegi aýa raiy jaǵdaiy qysqa merzimdi boljamdarda naqtylanady.
