«Astana – adaldyq alańy» jobasy aiasynda Nur-Sultan qalasyndaǵy sybailas jemqorlyqqa qarsy qyzmet dárilik zattar men meditsinalyq buiymdar saqtalatyn «SQ-Farmatsiia» logistikalyq habyna monitoring júrgizdi, dep habarlaidy QazAqparat.
Elordalyq biryńǵai distribiýtor 85 memlekettik meditsinalyq uiymdy dári-dármekpen tegin qamtamasyz etedi. Qoimanyń jalpy aýmaǵy 6,5 myń sharshy metrdi quraidy, onda dári-dármekti saqtaýǵa qajetti muzdatqysh kameralary, bólingen aimaqtar, belgili bir temperatýralyq rejim syndy barlyq jaǵdai qamtylǵan.
«Nur-Sultan qalasyndaǵy Biryńǵai distribiýtor arqyly Soltústik Qazaqstan, Pavlodar, Aqmola, Qaraǵandy, Qostanai oblystary jáne Nur-Sultan qalasyndaǵy 85 meditsinalyq uiym qamtamasyz etiledi. Onyń ishinde 5 respýblikalyq klinika men 80 qalalyq mańyzy bar meditsinalyq uiym bar. Bizde dári-dármek bir jyldan eki jylǵa deiin saqtalady. Shilde aiynda vedomstvoaralyq komissiianyń qaýlysy boiynsha 44 ataýdan turatyn dári-dármektiń azaimaityn qoryn qurý týraly tapsyrma berildi. Jeltoqsan aiynda Densaýlyq saqtaý ministrliginiń tapsyrmasymen, úsh dárilik zat bir preparatqa aýystyryldy, bir preparat – «Remedisivir» koronavirýsty emdeý protokolynan shyǵaryldy. Sol sebepti, qazir 44 ataýdyń 40-y saqtalýda. Dáriler boiynsha tapshylyq joq. Munda eki ailyq dári-dármekter qory qurylǵan», - «SQ-Farmatsiia» JShS Basqarýshy direktory – Basqarma múshesi Aimuart Saliev elordalyq habta ótken monitoringte.
Uiymnyń habarlaýynsha, azaimaityn qordyń eń tómengi tólemi eki ailyq bolýy kerek. Iaǵni ai saiyn keminde 60 myń patsientti emdeýge jetkilikti dári-dármek bolýy kerek. Iaǵni, bul qordan qandai da bir dári óńirlerge jiberilse, dereý tolyqtyrylyp otyrýy kerek.
Qazirgi ýaqytta pandemiia kezinde «SQ-Farmatsiia» qoimalarynyń jumysy ózgergen. Jumysshylar táýlik boiy úzilissiz birneshe aýysymmen jumys isteidi. Kelgen dári-dármek qoimada kóp jatpai, birden úilestirilip, tieledi.
Sonymen birge, QR Sybailas jemqorlyqqa qarsy is-qimyl agenttiginiń elordalyq departamentindegi preventsiia jáne parasattylyq basqarmasynyń basshysy Marat Hairýllin monitoringti qorytyndylady.
«Búgin «Astana – adaldyq alańy» jobasy aiasynda «SQ-Farmatsiia» qoimalarynyń dárilik zattarmen jáne qorǵanysh quraldarymen qamtamasyz etý qyzmetine monitoring júrgizdik. «SQ-Farmatsiia» uiymy keltirgen derekterge sáikes, qoimada tótenshe jaǵdailarǵa, onyń ishinde koronavirýs infektsiiasyna arnalǵan qor bar. Ózderińiz biletindei, pandemiianyń basynda dári-dármekpen qamtamasyz etý júiesiniń jetkilikti deńgeide bolmaǵany aitylyp edi. Qazir jaǵdaidyń túzelgenin kórip otyrmyz, barlyq dári-dármek jetkilikti, densaýlyq saqtaý qyzmetkerleri jeke qorǵanys quraldarymen jabdyqtalǵan.
Monitoringtiń negizgi maqsaty – sybailas jemqorlyq faktilerine jol bermeý, onyń ishinde qoǵamdy memlekettik uiymdar jumysyn baqylaýǵa tartý. Búgingi tekserý boiynsha eskertýler bolǵan joq, «SQ-Farmatsiia» densaýlyq saqtaý nysandaryna jiberiletin barlyq josparly shyǵyndar týraly málimetti berdi», - deidi Marat Hairýllin.
