Ózin Sybailas jemqorlyqqa qarsy qyzmettiń ókili dep tanystyrǵan birqatar alaiaq ustaldy. Bul týraly QR Sybailas jemqorlyqqa qarsy is-qimyl agenttiginiń aǵa ofitseri Dinara Qulymbetova málim etti, dep habarlaidy QazAqparat.
«2020 jyly jeke qaýipsizdik departamenti laýazymdy tulǵalardyń is-áreketterine qatysty 406 shaǵym men ótinishti qarady, 286 qyzmettik tergeý júrgizdi. Osyǵan orai Sybailas jemqorlyqqa qarsy qyzmet qyzmetkerleriniń jumys babyn paida kórý maqsatynda paidalanýǵa jol bermeý boiynsha is-sharany turaqty negizde júrgizip keledi. Sonymen qatar, ózderin Sybailas jemqorlyqqa qarsy qyzmettin atynan tanystyratyn adamdardyń alaiaqtyq áreketter jasaý faktileri oryn alyp otyr», - dedi D. Qulymbetova onlain rejimde ótken brifingide.
Onyń aitýynsha, 2020 jyly shilde aiynda Sybailas jemqorlyqqa qarsy qyzmettiń qyzmetkeri bolyp tanystarǵan Nur-Sultan qalasynyń turǵyny ustaldy. Birneshe ret alaiaqtyq áreket jasaý jáne asa iri somada para berýge itermeleý faktisi boiynsha jalpy somasy 70 mln teńgeden asatyn basqa azamattyń qarajatyn aldaý jolymen iemdengen. Sonymen qatar onyń 2014 jyldan bastap asa aýyr qylmys jasaǵany úshin memleketaralyq izdeýde ekeni anyqtaldy.
Budan bólek D. Qulymbetova basqa da alaiaqtyq faktilerine toqtaldy.
«2020 jyly mamyr aiynda Sybailas jemqorlyqqa qarsy qyzmet qyzmetkerleriniń jalǵan qyzmettik kýáligin paidalanyp, Qyzylorda oblysy aýmaǵynda 1 mln teńgeden astam somaǵa azamattyń múlkin iemdengen Túrkistan oblysy turǵynynyń alaiaqtyq áreketteriniń joly kesildi», - dedi ol.
Onyń sózine qaraǵanda, 2020 jyly jeltoqsan aiynda Almaty qalasynyń turǵyny aldaý jolymen ózin Sybailas jemqorlyqqa qarsy qyzmet qyzmetkerleri retinde tanystyryp, basqa azamattyń sot óndirisinde qylmystyq is boiynsha máselesine oń sheshim jasaý úshin 5 mln teńge somasynda qarajatty iemdengen. Qazirgi kezde alaiaqtyq faktisine qatysty sotqa deiingi tergeý júrip jatyr.
