Memlekettik qyzmet isteri jáne sybailas jemqorlyqqa qarsy is-qimyl agenttigi poiyz biletteriniń zańsyz satylymy máselesin kóterdi, dep habarlaidy QazAqparat tilshisi.
Agenttik ókilderi "Jasyryn satyp alýshylar" kómegimen zańsyz bilet satylymdaryn anyqtady jáne beinejazbalardy jariialady.
"Agenttikke biletterdiń zańsyz satylymy týraly habarlar kóptep túsýde, internet pen áleýmettik jelide de temir jol kassalarynan bilet tabý máseleleri kóterilip jatyr. 17 shildeden bastap, Qazaqstannyń barlyq óńirinde "jasyryn satyp alýshylar" arqyly monitoring júrip jatyr", - dedi Memlekettik qyzmet isteri jáne sybailas jemqorlyqqa qarsy is-qimyl agenttigi tóraǵasynyń orynbasary Oljas Bektenov Agenttikte ótken jinalysta.
Onyń aitýynsha, zańsyz alypsatarlardyń biletti anaǵurlym qymbat baǵaǵa satatyny baiaǵydan belgili.
"Jazǵy maýsymda biletke talas bastalady jáne belgili bir adamdarǵa júginý arqyly ońai bilet tabýǵa bolady. Biz júrgizgen monitoring osyny dáleldedi. Barlyq óńirde jumys istedik. Ásirese, kýrorttyq oryndarǵa aparatyn biletter zańsyz satylyp jatyr. Mundai zańsyz oqiǵalar Astana, Almaty jáne Aqmola oblystarynda baiqaldy. Bul óte júieli másele", - dedi Oljas Bektenov.
Sondai-aq, Bektenov atalǵan monitoring jumystarynyń aldyn alý sharalary ekenin atap ótti.
"Zańsyz alypsatarlardyń basym bóligi - jeke tulǵalar, olardyń vokzal ákimshiligimen qanshalyqty bailanys ornatqany mańyzdy bolyp otyr. Munda bireýdi ustap alyp, jazalaý maqsat emes. Bizdiń mindetimiz - qoǵamdy ashyqtyqqa shaqyrý. Qazir aldyn ala sybailasý faktileriniń bar-joǵy týraly anyq aita almaimyn, sebebi eshqandai sotqa deiingi tergeý jumystary júrgizilgen joq. Biz júrgizgen jumystar aldyn alý sharalary ǵana", - dep óz sózin túiindedi Agenttik ókili.
