“Jaýjúrek myń bala” filmindegi Sartai róli arqyly kópshilikke tanylǵan akter Asylhan Tólepov alǵashqy tanymaldyqtyń ómirine qalai áser etkenin aityp berdi. Óner iesiniń sózinshe, film jaryqqa shyqqannan keiin taksi júrgizýshileri ony tegin tasyp, meiramhana qyzmetkerleri de kórsetken qyzmeti úshin aqy almaǵan, dep habarlaidy ult.kz.
Akter “Intelligentno qý” jobasynda qonaq bolyp, 2012 jyly “Jaýjúrek myń bala” filmi ekranǵa shyqqannan keiin basynan ótken qyzyqty oqiǵalardy eske aldy.
Onyń aitýynsha, tarihi týyndy kórermenge jol tartqan alǵashqy kúnnen bastap ómiri kúrt ózgergen. Áleýmettik jelidegi tanymaldyǵy da birden artqan.
“Jaýjúrek myń bala” 3 mamyrda jaryqqa shyqty. 4 mamyrda meniń “Moi Mirimde” 435 myń adam bolyp ketti”, – dedi akter.
Filmdegi Sartai beinesi kórermenniń erekshe yqylasyna bólengen. Asylhandy kóshede kezdestirgen adamdar birden tanyp, jyly lebizderin bildiretin bolǵan. Ásirese, taksi júrgizýshileriniń áreketi akterdiń esinde qalypty. Onyń aitýynsha, keibir júrgizýshiler kóshede turǵanyn baiqamai ótip ketse de, keiin tanyp, kóligin keri buryp kelgen.
“Taksi ustaimyn ǵoi. Ótip ketedi de, artqa júrip: “Ei, otyr, baýyrym, otyr”, – dep salyp alady. Sosyn artqa qarap: “Jaqsy túskensiń”, – deidi. Men alty-jeti ai taksige múlde aqsha tólegen joqpyn. Múlde almaityn menen”, – dep eske aldy ol.
Mundai jaǵdai tek takside ǵana emes, qoǵamdyq tamaqtaný oryndarynda da qaitalanǵan. Akterdiń sózinshe, shamamen jarty jyl boiy meiramhanalarda tamaqtanǵany úshin de aqsha tólemegen. Alaida bul erekshe qurmet uzaqqa sozylmaǵan. Jeltoqsan aiynda taksige mingen akter ádettegidei jolaqysyn usynǵanda, júrgizýshi aqshany alyp qoiǵan. Óner iesi osy oqiǵany ázilmen eske alyp, alǵashqy tanymaldyqtyń áseri birtindep basylǵanyn jetkizdi.
Bir ról arqyly búkil elge tanyldy
Asylhan Tólepovtiń akterlik mansabyndaǵy eń mańyzdy týyndylardyń biri – 2012 jyly jaryq kórgen “Jaýjúrek myń bala” tarihi filmi.
Rejisser Aqan Sataev túsirgen kartinada ol basty keiipker Sartaidyń rólin somdady. Sol kezde jasy jiyrmaǵa da tolmaǵan jas akterdiń oiyny kórermenniń erekshe yqylasyna bólendi. Film XVIII ǵasyrdaǵy jońǵar shapqynshylyǵy kezinde elin qorǵaýǵa attanǵan qazaq jastarynyń erligin baiandaidy. Týyndyda batyrlyq pen dostyq, mahabbat pen otansúigishtik taqyryptary qatar órilgen.
Kartinaǵa Aian Ótepbergen, Quralai Anarbekova, Berik Aitjanov, Bolat Ábdilmanov jáne Nurlan Álimjan syndy akterler de túsken.
Túsirilimge daiyndyq barysynda akterler arnaiy jattyǵýdan ótken. Olar eki ai boiy atqa miný, sadaq atý jáne jaýyngerlik qimyldardy meńgergen.
Akter 60-qa jýyq balanyń tusaýyn kesken
Asylhan Tólepov suhbat barysynda Sartai rólinen keiin halyqtyń ózine degen yqylasy kútpegen deńgeige jetkenin de aitty.
Onyń sózinshe, filmdi kórgen keibir ata-analar uldaryna Sartai esimin qoia bastaǵan. Tipti balalarynyń tusaýyn kesýdi akterdiń ózinen suraǵan otbasylar da bolǵan. Óner iesi osy ýaqytqa deiin alpysqa jýyq balanyń tusaýyn keskenin jetkizdi.
Osylaisha, “Jaýjúrek myń bala” filmindegi bir ról Asylhan Tólepovke keń tanymaldyq ákelip qana qoimai, halyqpen erekshe bailanys ornatýyna sebep bolǵan.
Akterdiń aitýynsha, sol kezeńdegi tegin taksi, meiramhanalardaǵy qurmet pen balalardyń tusaýyn kesýge shaqyrýlar onyń shyǵarmashylyq jolyndaǵy umytylmas estelikteriniń birine ainalǵan.
Asylhan Tólepov kim?
Asylhan Tólepov – qazaqstandyq teatr jáne kino akteri, kópshilikke “Jaýjúrek myń bala” tarihi filmindegi Sartai róli arqyly tanylǵan óner iesi. Ol 1992 jyly 21 mamyrda Almaty oblysynda dúniege kelgen. Bala kezinen ónerge qyzyǵýshylyq tanytyp, akterlik mamandyqty tańdaǵan. T. Júrgenov atyndaǵy Qazaq ulttyq óner akademiiasynda bilim alǵan. 2012 jyly rejisser Aqan Sataevtyń “Jaýjúrek myń bala” filminde basty róldi somdap, keńinen tanyldy. Bul týyndyda ol elin jońǵar shapqynshylyǵynan qorǵaýǵa attanǵan jas batyr Sartaidyń beinesin ekranǵa shyǵardy. Filmnen keiin akterdiń tanymaldyǵy artyp, otandyq kino salasyndaǵy shyǵarmashylyq joly jalǵasty.
2011 jyly T. Júrgenov atyndaǵy Qazaq ulttyq óner kolledjin “Mýzykalyq teatr artisi” mamandyǵy boiynsha támamdady. Al 2015 jyly osy oqý ornynyń akademiiasyn “Mýzykalyq drama artisi” mamandyǵy boiynsha bitirdi. Akter “Balalyq shaǵymnyń aspany”, “Baýyrjan Momyshuly”, “Shyńyraý”, “Tomiris” jáne “Qarjyger. Ketý oiyny” filmderine túsken. 2013 jyly Sartai róli úshin “Serper” jastar syilyǵyn ielendi. 2016 jyly “Teatr jáne kino” atalymy boiynsha “Daryn” memlekettik jastar syilyǵynyń laýreaty atandy. Sol jyly 23 jasynda Almaty qalasy máslihatynyń depýtaty bolyp sailandy. 2019 jyly shyǵarmashylyqqa basymdyq berý úshin depýtattyq ókilettigin óz erkimen toqtatty.
