Tanymal ánshi Sáken Maiǵaziev ómirden ótken anasyn eske alyp, áleýmettik jelide kópshiliktiń júregin eljiretken jazba jariialady. Óner iesi anasynyń kózi tirisinde janynda kóbirek bolmaǵanyna ókinetinin aityp, barsha jurtqa úndeý jasady, dep habarlaidy ult.kz.
Ánshi Instagram paraqshasynda anasynyń ómir jolyna toqtalyp, onyń otbasy úshin jasaǵan eńbegin erekshe yqylaspen eske aldy. Aitýynsha, anasy on qursaq kóterip, ul-qyz tárbielep ósirgen, nemere-shóbereleriniń qyzyǵyn kórgen ardaqty jan bolǵan.
«Ólim – haq. Árbir tirshilik iesi ólimniń dámin tatady. Alaida, anashym siiaqty ónegeli ómir súrip, ǵibratty ǵumyr keship, ALLA taǵalanyń buiyrǵan bes paryzyn buljytpai oryndap, ata-ana, ata-ene, adal jardyń razylyǵyn alyp, on qursaq kóterip, Maiǵazy atamnan taraǵan tórt uldyń urpaqtarynyń barlyǵyn baýyryna basyp, emizip, sosyn beinetiniń zeinetin kórgen analardyń biri bizdiń anamyz», – dep jazdy ánshi.
Sáken Maiǵaziev anasynyń janynda bolýǵa barynsha tyrysqanyn, qoly bosaǵan saiyn aýylǵa baryp, kóńilin tabýdy oilaǵanyn jetkizdi. Alaida jaqynynan aiyrylǵan soń adamnyń kóńilinde báribir ókinish qalatynyn jasyrmady.
«Bir kún ýaqytym bolsa aýylǵa baryp anashymnyń kóńilin tabýǵa qansha tyrysyp júrmin desem de, “Nege budan da kóbirek qasynda bolmadym” degen ókinish ózegińdi órteidi eken», – dedi óner iesi.
Osy rette ánshi ata-anasy tiri jandarǵa mańyzdy úndeý jasap, ýaqytty keiinge qaldyrmai, jaqyndarynyń jaǵdaiyn jii surap turýǵa shaqyrdy.
«Sol úshin anasy bar adamdar, qazir qońyraý shalyp, halin bilip, densaýlyǵyna kóńil bólip qoiyńyzdar», – dep jazdy ol.
Óner iesi anasynyń ózine razy bolǵanyn birneshe ret estigenin aityp, osy sózderdiń qazir janyna medeý bolyp otyrǵanyn jetkizdi.
«Allaǵa shúkir, anamnyń “Balam, saǵan razymyn” degen sózin birneshe ret estigen baqytty perzentterdiń birimin. Sonyń ózi júregime jubanysh, janyma medeý», – dedi ánshi.
Sondai-aq Sáken Maiǵaziev otbasynyń qaiǵysyna ortaqtasyp, kóńil aityp jatqan qazaqstandyqtar men sheteldegi baýyrlas halyqtarǵa alǵysyn bildirdi. Ol anasynyń aq jolyn jubaiy, qyzdary, ápke-qaryndastary men ózge de jaqyndary jalǵastyrsyn degen tilegin jetkizdi.
«Kúlli qazaqtyń anasyna ainalǵan aq mamam, janyńyz jánnattyń tórinde shalqysyn. ALLANYŃ meiirimine bólenip, PAIǴAMBARYMYZDYŃ shapaǵatynda bolyńyz», – dep túiindedi ánshi.
Óner iesiniń anasyna arnalǵan jazbasy áleýmettik jelide kópshiliktiń nazaryn aýdardy. Jariialanym 100 myńnan astam unatý belgisin jinap, alty myńnan astam pikir qaldyrylǵan. Oqyrmandar ánshige kóńil aityp, qaiǵysyna ortaqtasyp jatyr.
Sáken Maiǵaziev kim?
Sáken Maiǵaziev – qazaqstandyq tanymal ánshi, "MýzART" tobynyń múshesi, Qazaqstannyń eńbek sińirgen qairatkeri. Ol qazaq estradasynda ózindik orny bar óner ieleriniń biri. Ánshi jeke shyǵarmashylyǵymen qatar, "MýzART" tobynyń quramynda halyqqa keńinen tanyldy.
Sáken Qordabaiuly Maiǵaziev 1975 jyly 1 qańtarda Túrkistan oblysynyń Sozaq aýdanynda dúniege kelgen. Ol – Qazaqstannyń eńbek sińirgen qairatkeri, ánshi, telejúrgizýshi jáne óner salasynyń ustazy. Óner iesi Qordabai Maiǵazyuly men Ultai Myrzambekqyzynyń kópbalaly otbasynda tárbielengen. Ol otbasyndaǵy on bir balanyń toǵyzynshysy. 1993 jyly Júsipbek Elebekov atyndaǵy respýblikalyq estrada-tsirk kolledjinde bilim alǵan. 1997 jyly Temirbek Júrgenov atyndaǵy Qazaq ulttyq óner akademiiasynda estrada ánshisi mamandyǵy boiynsha oqýyn aiaqtaǵan.
2001 jyldan bastap tanymal "MýzART" tobynyń quramynda óner kórsetip keledi. Ánshi 1998 jyly "Daryn" memlekettik jastar syilyǵynyń laýreaty atanǵan. 2013 jyly oǵan Qazaqstannyń eńbek sińirgen qairatkeri qurmetti ataǵy berildi. 2012 jyldan bastap Júsipbek Elebekov atyndaǵy estrada-tsirk kolledjinde ustazdyq qyzmet atqarǵan. 2018–2020 jyldary Temirbek Júrgenov atyndaǵy Qazaq ulttyq óner akademiiasynda prorektor bolǵan. 2020 jyldyń jeltoqsanynda Shymkent qalalyq mádeniet úiiniń basshysy bolyp taǵaiyndalǵan. Sáken Maiǵazievtiń jubaiy – Dinara, olardyń Ádilet esimdi uly jáne Raiana men Máriiam esimdi qyzdary bar. 2025 jyly ánshi 50 jasqa tolýyna orai Túrkistan qalasynda shyǵarmashylyq kontsert ótkizgen. 2026 jylǵy 13 qazanda onyń anasy Ultai Myrzambekqyzynyń ómirden ótkeni belgili boldy.
