Almatydaǵy sot otyrysynda prokýror «QazTransGaz» basshysynyń eks-keńesshisi, «Nur Otannyń» burynǵy ideology Sanjar Boqaevqa taǵylǵan aiyptardy jariia etti. Oǵan alaiaqtyq, qylmystyq jolmen alynǵan kiristerdi zańdastyrý, urlyq, aǵashtardy zańsyz kesý jáne jalǵan aqparat taratý siiaqty birqatar qylmystyq áreket boiynsha aiyp taǵylyp otyr.
Qylmystyq istiń bir epizodynda qarajatty jymqyrý jáne zańdastyrý tásilin qalai júzege asyrylǵany baiandalady. Prokýrordyń aitýynsha, bul aila-sharǵyny Boqaevtyń ózi oilastyryp, uiymdastyrǵan.
«QazTransGaz» basshysynyń keńesshisi bolyp júrgende Boqaev kompaniianyń kásipodaǵy arqyly qarajat shyǵarýdyń ońtaily jolyn tapqan. Óitkeni kásipodaqqa memlekettik satyp alý týraly zańnamanyń talaptary qoldanylmaǵan. Demek, kásipodaq merekelik jáne ózge de is-sharalarǵa konkýrstar men tenderler ótkizbei-aq qarajat jumsai alǵan.
Osy múmkindikti paidalanǵan Boqaev kásipodaqqa is júzinde ózine tiesili
«BM Trust» JShS-imen jumys isteýdi usynǵan. Kúdik týǵyzbaý úshin kompaniiany aldyn ala óziniń týysy Madiiar Qalmenovtiń atyna rásimdegen. Qalmenov te bul qylmysqa qatysqan dep aiyptalýda.
Alǵashynda Boqaev ózin senimdi seriktes retinde kórsetýge tyrysty. Ol Jańa jyl merekesi men sporttyq jarystardy qosa alǵanda, birneshe korporativtik is-shara uiymdastyrǵan. Osy ýaqytta kásipodaq basshylyǵy shyǵyndardy múlde teksermeitinin baiqaǵan. Olar Boqaev usynǵan barlyq shyǵyndar smetasyna esh tekserýsiz qol qoia bergen. Bul jaǵdai onyń ári qarai esh kedergisiz áreket etýine jol ashqan.
Qarajatty jymqyrý 2018 jyldyń kúzinde, Batys Qytaidan Batys Eýropaǵa deiin gazben júretin avtokólikterdiń iri halyqaralyq avtosherýin ótkizý josparlanǵan kezde júzege asyrylǵan. Boqaev is-sharanyń qunyn ádeii 86,8 million teńgege deiin kóterip, eki kelisimshart jasaý arqyly qarajat shyǵarý tásilin qoldanǵan.
Avtosherýdi naqty uiymdastyrý jáne qajetti jumystardy atqarý úshin «We Can» JShS jaldanyp, oǵan 38,9 million teńge tólengen. Alaida dál sol ýaqytta kásipodaq Boqaevtyń baqylaýyndaǵy «BM Trust» kompaniiasymen 47,9 million teńgege ekinshi kelisimshart jasasqan. Bul kompaniia is júzinde eshqandai jumys atqarmai, qarajatty negizsiz alǵan.
Daiyndyq jumystary júrip jatqanda Boqaev qyzmettik jaǵdaiyn paidalanyp, is-sharanyń naqty oryndaýshysy «We Can» JShS-in qarajattyń bir bóligin ózi kórsetken adamdardyń esepshottaryna aýdarýǵa májbúrlegen. Aqsha belgili bir qyzmetter úshin tólem retinde rásimdelgen. Qarajattyń bir bóligi Boqaevtyń anasynyń atyna tirkelgen «Kun-Arai» kompaniiasynyń esepshotyna, al taǵy bir bóligi tikelei Qalmenovke aýdarylǵan.
Sodan keiin «BM Trust» arqyly jymqyrǵan qarajatty zańdastyrý qajet bolǵan. Osy maqsatta Boqaev aqshany óziniń jeke biznesin, iaǵni jihaz óndirisin damytýǵa jumsaǵan. Aiyptaý tarapynyń málimetine sáikes, jymqyrylǵan qarajat esebinen Astanadaǵy óndiristik tsehtar men keńselerdiń jaldaý aqysy tólenip, stanoktar men kompiýterler satyp alynǵan. Sondai-aq býhgalterlerdiń qyzmetine, kúzet pen jarnamaǵa qarjy jumsalǵan. Barlyǵy osyndai 19 bank operatsiiasy júzege asyryldy.
Qalmenov shamamen 10 million teńgeni qolma-qol aqshaǵa ainaldyrǵan. Aiyptalýshylar bul qarajatty jeke qajettilikterine, sonyń ishinde áýe biletteri men qonaqúilerdiń aqysyn tóleýge paidalanǵan.
Nátijesinde, memlekettik aiyptaýshynyń málimdeýinshe, sottalýshylar jalǵan qujattar men qyzmettik jaǵdaiyn paidalaný arqyly kásipodaqtyń 42 million teńgeden astam qarajatyn jymqyrǵan.
