Qazaqstandyq suiytylǵan gaz óndirýshiler janarmaidyń bul túriniń arzandyǵynan shyǵynǵa batyp otyr. Janarmai quiý stantsiialaryndaǵy suiytylǵan gazdyń aǵymdaǵy quny kompaniialardyń ony óndirýge jáne jabdyqty jańartýǵa jumsaityn shyǵyndaryn ótemeidi, dep habarlaidy "Ult aqparat".
Belgilengen shekti kóterme baǵa tonnasyna QQS-syz 40 320 teńge bolǵanda, suiytylǵan gazdy óndirý quny zaýytqa bailanysty tonnasyna 50 000-72 000 teńgeni quraidy. Bul eldegi janarmai quiý beketterindegi tómen bólshek saýda baǵasyn ustaýǵa múmkindik beredi. Nátijesinde Qazaqstanda suiytylǵan gazdy tutyný negizinen avtokólik júrgizýshileriniń esebinen ósip, al óndiris kólemi tómendeýde.
Bul týraly suiytylǵan gaz óndirýshilerdiń ózderi de aitýda. Máselen, «Qazgermunai» BK» JShS suiytylǵan gazdyń búgingi tańda QR Energetika ministrligi belgilegen baǵasy ónimniń ózindik qunynan tómen ekendigin, shyǵyndardy ótemeitinin atap ótti. Kásiporyn Aqshabulaq, Nuraly, Aqsai ken oryndaryndaǵy ilespe munai gazyn jáne Ońtústik Aqsai kenishinen shyǵatyn tabiǵi gazdy óńdep, Qyzylorda oblysynyń turǵyndaryn suiytylǵan gazben qamtamasyz etedi. «Qazgermunai» jylyna 60 myń tonnaǵa jýyq suiytylǵan gaz óndiredi.
«Búginde suiytylǵan munai gazyn óndirý quny Ministrlik bekitken suiytylǵan munai gazynyń baǵasynan asyp túsedi. Bul rette qondyrǵynyń paidalaný merzimin eskere otyryp jáne úzdiksiz óndiristik protsesti qamtamasyz etý úshin únemi josparly jóndeý jumystaryn júrgizý jabdyqty jańartý, tozǵan bólshekterdi aýystyrý jáne t.b. qajet – dep atap ótti bas direktordyń óndiris jónindegi orynbasary Mahambet Eleýsinov.
Suiytylǵan gaz óndirýge investitsiia salýǵa múmkindigi bar jer qoinaýyn paidalanýshylar buǵan qyzyǵýshylyq tanytpaidy. Suiytylǵan gazdy óndirýdi jalǵastyryp jatqan jer qoinaýyn paidalanýshylar muny shikizatty óndiretin óńirler aldyndaǵy áleýmettik mindetteme retinde oryndap otyr.
Qazirgi ýaqytta suiytylǵan gaz óndiretin kásiporyndar Energetika ministrligimen birge suiytylǵan gazdyń óndiris qunyn ótei alatyndai baǵa belgileý máselesin talqylap jatyr.
«Naqty aitqanda, búginde naryqta kompaniialardyń suiytylǵan gazdy óndirýge ketken shyǵyndary ótelmeitin jaǵdai qalyptasty. Suiytylǵan munai gazyn óndirý rentabelsiz bolǵandyqtan sala shyǵynǵa ushyraýda, júieli jóndeý jumystary júrgizilmeidi jáne jańǵyrtýǵa qarajat salý qiynǵa soǵýda.
Jańǵyrtý men josparly jóndeýge qarajaty jetkiliksiz óndiris oryndarynyń apatty toqtaýlary jiilep, eldi suiytylǵan gazben qajetti mólsherde qamtamasyz etý qiynǵa soǵýda», - dep atap ótti QR Energetika ministrligi gaz ónerkásibi departamentiniń direktory Baqytjan Taýbaev.
