قازاقستاندىق سۇيىتىلعان گاز ٶندٸرۋشٸلەر جانارمايدىڭ بۇل تٷرٸنٸڭ ارزاندىعىنان شىعىنعا باتىپ وتىر. جانارماي قۇيۋ ستانتسييالارىنداعى سۇيىتىلعان گازدىڭ اعىمداعى قۇنى كومپانييالاردىڭ ونى ٶندٸرۋگە جەنە جابدىقتى جاڭارتۋعا جۇمسايتىن شىعىندارىن ٶتەمەيدٸ, دەپ حابارلايدى "ۇلت اقپارات".
بەلگٸلەنگەن شەكتٸ كٶتەرمە باعا تونناسىنا ققس-سىز 40 320 تەڭگە بولعاندا, سۇيىتىلعان گازدى ٶندٸرۋ قۇنى زاۋىتقا بايلانىستى تونناسىنا 50 000-72 000 تەڭگەنٸ قۇرايدى. بۇل ەلدەگٸ جانارماي قۇيۋ بەكەتتەرٸندەگٸ تٶمەن بٶلشەك ساۋدا باعاسىن ۇستاۋعا مٷمكٸندٸك بەرەدٸ. نەتيجەسٸندە قازاقستاندا سۇيىتىلعان گازدى تۇتىنۋ نەگٸزٸنەن اۆتوكٶلٸك جٷرگٸزۋشٸلەرٸنٸڭ ەسەبٸنەن ٶسٸپ, ال ٶندٸرٸس كٶلەمٸ تٶمەندەۋدە.
بۇل تۋرالى سۇيىتىلعان گاز ٶندٸرۋشٸلەردٸڭ ٶزدەرٸ دە ايتۋدا. مەسەلەن, «قازگەرمۇناي» بك» جشس سۇيىتىلعان گازدىڭ بٷگٸنگٸ تاڭدا قر ەنەرگەتيكا مينيسترلٸگٸ بەلگٸلەگەن باعاسى ٶنٸمنٸڭ ٶزٸندٸك قۇنىنان تٶمەن ەكەندٸگٸن, شىعىنداردى ٶتەمەيتٸنٸن اتاپ ٶتتٸ. كەسٸپورىن اقشابۇلاق, نۇرالى, اقساي كەن ورىندارىنداعى ٸلەسپە مۇناي گازىن جەنە وڭتٷستٸك اقساي كەنٸشٸنەن شىعاتىن تابيعي گازدى ٶڭدەپ, قىزىلوردا وبلىسىنىڭ تۇرعىندارىن سۇيىتىلعان گازبەن قامتاماسىز ەتەدٸ. «قازگەرمۇناي» جىلىنا 60 مىڭ تونناعا جۋىق سۇيىتىلعان گاز ٶندٸرەدٸ.
«بٷگٸندە سۇيىتىلعان مۇناي گازىن ٶندٸرۋ قۇنى مينيسترلٸك بەكٸتكەن سۇيىتىلعان مۇناي گازىنىڭ باعاسىنان اسىپ تٷسەدٸ. بۇل رەتتە قوندىرعىنىڭ پايدالانۋ مەرزٸمٸن ەسكەرە وتىرىپ جەنە ٷزدٸكسٸز ٶندٸرٸستٸك پروتسەستٸ قامتاماسىز ەتۋ ٷشٸن ٷنەمٸ جوسپارلى جٶندەۋ جۇمىستارىن جٷرگٸزۋ جابدىقتى جاڭارتۋ, توزعان بٶلشەكتەردٸ اۋىستىرۋ جەنە ت.ب. قاجەت – دەپ اتاپ ٶتتٸ باس ديرەكتوردىڭ ٶندٸرٸس جٶنٸندەگٸ ورىنباسارى ماحامبەت ەلەۋسٸنوۆ.
سۇيىتىلعان گاز ٶندٸرۋگە ينۆەستيتسييا سالۋعا مٷمكٸندٸگٸ بار جەر قويناۋىن پايدالانۋشىلار بۇعان قىزىعۋشىلىق تانىتپايدى. سۇيىتىلعان گازدى ٶندٸرۋدٸ جالعاستىرىپ جاتقان جەر قويناۋىن پايدالانۋشىلار مۇنى شيكٸزاتتى ٶندٸرەتٸن ٶڭٸرلەر الدىنداعى ەلەۋمەتتٸك مٸندەتتەمە رەتٸندە ورىنداپ وتىر.
قازٸرگٸ ۋاقىتتا سۇيىتىلعان گاز ٶندٸرەتٸن كەسٸپورىندار ەنەرگەتيكا مينيسترلٸگٸمەن بٸرگە سۇيىتىلعان گازدىڭ ٶندٸرٸس قۇنىن ٶتەي الاتىنداي باعا بەلگٸلەۋ مەسەلەسٸن تالقىلاپ جاتىر.
«ناقتى ايتقاندا, بٷگٸندە نارىقتا كومپانييالاردىڭ سۇيىتىلعان گازدى ٶندٸرۋگە كەتكەن شىعىندارى ٶتەلمەيتٸن جاعداي قالىپتاستى. سۇيىتىلعان مۇناي گازىن ٶندٸرۋ رەنتابەلسٸز بولعاندىقتان سالا شىعىنعا ۇشىراۋدا, جٷيەلٸ جٶندەۋ جۇمىستارى جٷرگٸزٸلمەيدٸ جەنە جاڭعىرتۋعا قاراجات سالۋ قيىنعا سوعۋدا.
جاڭعىرتۋ مەن جوسپارلى جٶندەۋگە قاراجاتى جەتكٸلٸكسٸز ٶندٸرٸس ورىندارىنىڭ اپاتتى توقتاۋلارى جيٸلەپ, ەلدٸ سۇيىتىلعان گازبەن قاجەتتٸ مٶلشەردە قامتاماسىز ەتۋ قيىنعا سوعۋدا», - دەپ اتاپ ٶتتٸ قر ەنەرگەتيكا مينيسترلٸگٸ گاز ٶنەركەسٸبٸ دەپارتامەنتٸنٸڭ ديرەكتورى باقىتجان تاۋباەۆ.
