Suiytylǵan gaz baǵasynyń kúrt ósýin shekteitin is-sharalar qabyldanady. Bul týraly búgin Úkimet otyrysynda QR Energetika ministri Bolat Aqsholaqov aitty, dep habarlaidy QazAqparat.
«Suiytylǵan gaz naryǵyndaǵy jaǵdaidy tolyq baqylaýdy qamtamasyz etý maqsatynda jedel is-sharalar qabyldandy. Atap aitqanda, Energetika ministrligi 2 buiryq bekitti. Birinshisi - 2023 jylǵy 1 qańtarǵa deiin saýda-sattyq qaǵidalaryn toqtata turý jónindegi buiryq. Oǵan sáikes Energetika ministrligi suiytylǵan gazdy elektrondyq saýda-sattyqtan tys ótkizetin bolady. Ekinshisi - suiytylǵan munai gazynyń shekti kóterme saýda baǵasyn tómendetý jónindegi buiryq. Oǵan sáikes gazdyń bir tonnasy 28 myń teńgege deiin belgilenedi», - dedi ministr.
Sonymen qatar ol búgingi kúni elektrondyq saýda alańdarynan tys ishki naryqqa suiytylǵan gazdy jetkizý josparyn qalyptastyrý qaǵidalaryna túzetýler engizý boiynsha buiryq ázirlengenin aitty.
Bul túzetýler respýblika aýmaǵynda kóterme jáne bólshek saýdada ótkizý quqyǵy bar sýbektilerdiń tizbesin keńeitý arqyly eldiń ishki naryǵyn suiytylǵan gazben qamtamasyz etýge baǵyttalǵan.
«Qysqa merzimdi is-sharalar retinde osy jylǵy qańtar aiynyń sońyna deiin Úkimetke suiytylǵan munai gazy baǵasynyń kúrt ósýin shekteitin ashyqtyq qaǵidattary men tetikterdi engizýdi eskere otyryp, elektrondyq saýda alańy/taýar birjalary arqyly suiytylǵan gaz saýda-sattyǵyn odan ári jetildirý jóninde keshendi is-sharalar engiziletin bolady. Úkimetpen kelisilgennen keiin bul is-sharalar normativtik quqyqtyq aktilerge túzetýler engizý túrinde resimdeledi», - dedi Bolat Aqsholaqov.
