Foto: Turar Qazanǵapov
Premer-Ministrdiń orynbasary – QR Saýda jáne integratsiia ministri Baqyt Sultanovtyń issaparlary kóp jaǵdaida ekonom-klasspen júrgiziledi. Bul týraly ministrliktiń baspasóz qyzmeti túsinikteme berdi, dep habarlaidy QazAqparat.
«Biznes-klass tek shuǵyl jaǵdaida, ekonom-klass biletteri bolmaǵan kezde ǵana jasalǵan. QR Úkimetiniń 2018 jylǵy 11 mamyrdaǵy «Biýdjet qarajaty esebinen qyzmettik issaparlarǵa, onyń ishinde shet memleketterge issaparlarǵa arnalǵan shyǵyndardy óteý qaǵidalaryn bekitý týraly» №256 qaýlysyna sáikes, Premer-Ministrdiń orynbasarlaryna biznes-klass tarifi boiynsha áýe kóligimen ushýǵa ruqsat beriledi», - dep túsindirdi Saýda jáne intergatsiia ministrliginiń baspasóz qyzmeti.
Sonymen birge, vedomstvo biylǵy aqpan aiynda Almaty qalasy men Almaty oblysyndaǵy jumys saparyna jeke toqtaldy.
«Osy naqty jaǵdaida máselelerdi sol jerde sheshý úshin birqatar múddeli memlekettik organ ókilderinen turatyn delegatsiianyń ushyp shyǵýy qajet bolǵanyn atap ótken jón. Osyǵan bailanysty arnaiy bort («Búrkit» memlekettik aviakompaniiasy» literlik reisi) paidalanyldy. Aqpan aiyndaǵy Almatyǵa jumys sapary Qyrǵyz Respýblikasy Úkimetimen halyqaralyq kelissózge jáne Qyrǵyz Respýblikasy men Resei Federatsiiasy delegatsiialarymen úshjaqty kelissózge bailanysty boldy», - dep jazylǵan resmi jaýapta.
Bul issaparda qazaqstandyq delegatsiia quramyna birqatar múddeli memlekettik organdardyń ókilderi kirgen.
Qazaqstan tarapyn Premer-Ministrdiń orynbasary – Saýda jáne integratsiia ministri Baqyt Sultanov, qyrǵyz delegatsiiasyn Ministrler Kabineti tóraǵasynyń birinshi orynbasary Arzybek Kojoshev bastaǵan.
Resei delegatsiiasynda Resei Qarjy ministriniń orynbasary - stats hatshysy Aleksei Sazanov jáne keden, salyq qyzmetteriniń basshylyǵy bolǵan.
«Olar Qazaqstan-Qytai shekarasyndaǵy «Nur joly» ótkizý beketine, «Qorǵas-Shyǵys qaqpasy» erkin ekonomikalyq aimaǵyna jáne «Qorǵas» ShYHO-ǵa barǵan. Basty maqsat – júk tasymalynyń biryńǵai elektrondyq kezeginiń problemalaryn sheshý jáne júk tasymaldaýdyń jeke operatorlaryn alyp tastaý arqyly olardyń qunyn edáýir tómendetý bolǵan. Aita keteiik, shuǵyl máselelerdi sheshýge eki kún ǵana ýaqyt berildi. Osyǵan bailanysty jedel jetý maqsatynda osyndai jaǵdailarǵa arnalǵan arnaiy bort paidalanyldy», - deidi ministrik.
Jalpy jyl basynan beri Baqyt Sultanov shamamen 15 jumys issaparyna barǵan. Olardyń kópshiligi sheteldik issaparlar, onyń ishinde Memleket basshysynyń sapary da bar.
Buǵan deiin Telegram-daǵy ProTenge arnasynda bul týraly aqparat jariialanǵan, onda Baqyt Sultanov biýdjetten Almaty oblysyna eki kúndik issaparyna 9,6 million teńge jumsady delingen edi.
17 mamyrda vitse-premer Eraly Toǵjanov jýrnalistiń "ministrlerdiń milliondaǵan qarajatqa jasaǵan issaparlary" týraly suraǵyna jaýap bere otyryp, qazaqstandyq ministrlerdiń jeke ushaqtary joǵyn, sondyqtan reis ushaqtarymen ushatynyn málimdegen bolatyn.
