Saýda jáne integratsiia ministri Baqyt Sultanov ózi jetekshilik etip kele jatqan vedomstvonyń 2021 jylǵy josparyn jariialady, dep habarlaidy QazAqparat.
«Biz ministrliktiń 2021 jylǵa arnalǵan jumys josparyn qurdyq, orta merzimdi perspektivasyn aiqyndadyq. Men úsh mańyzdy máseleni atap ótkim keledi. Birinshisi - syrtqy saýda qyzmetindegi basymdyqtar. Olar basym eksporttaýshy eldermen, bizdiń seriktestermen saýda-ekonomikalyq yntymaqtastyqty nyǵaitýǵa baǵyttalady», - dedi Baqyt Sultanov Saýda jáne integratsiia ministrliginiń alqa otyrysynda.
Ministr syrtqy saýda qyzmetindegi basymdyqtar retinde qarastyrylyp otyrǵan memleketterdi atady.
«Bul EAEO, QHR, Ortalyq Aziia elderi men Eýropalyq Odaq. EAEO-ǵa Qazaqstan tóraǵalyq etken kezde negizgi jumys odaq týraly kelisimdi, EAEO 2025 jylǵa deiingi damý strategiiasyn júzege asyrýǵa baǵyttalady. Buryn aitylǵandai, ulttyq múddelerdi qorǵaý boiynsha kóptegen jumys júrgizildi. Bul qujat biz úshin mańyzdy jáne qajetti formatta qabyldandy. Saýda-ekonomikalyq yntymaqtastyqty nyǵaitý jáne kedergilerdi joiý boiynsha jumys áli de júrgiziledi. Sondai-aq, DSU-nyń jańa talaptaryn engizýdi eskere otyryp, otandyq biznesti qoldaýdyń jańa sharalaryn ázirleý kózdelip otyr», - dedi ministr.
Baqyt Sultanov odan bólek otandyq kásiporyndardyń básekege qabilettiligine, syrtqy naryqtarǵa shyǵýǵa, otandyq kásipkerlerdiń el ishinde de, syrtynda da múddelerin qorǵaýǵa basa mán beriletinin málimdedi.
