QR qarjy ministri Baqyt Sultanov biýdjet qarajatyn igere almai otyrǵan ministrlikterge jergilikti organdardan úlgi alýǵa shaqyrdy, dep habarlaidy Sputnik Qazaqstan tilshisi.
2018 jyldyń I toqsanyndaǵy respýblikalyq biýdjettiń oryndalý qorytyndysy boiynsha, respýblikalyq biýdjetke 1 299 milliard teńge kiris túsken. Bul jospardan 24 milliard teńgege, al byltyrǵy jyldyń osyndai kezeńimen salystyrǵanda 142 milliard teńgege artyq.
"Jospardyń asyra oryndalýy salyq esebinen – 17 milliard teńge, salyqtan tys tólemder boiynsha – 7 milliard teńge qalyptasty. Salyq josparynyń artyǵymen oryndalýyna taý-ken ónerkásibinde ónim shyǵarýdyń 105,5%-ke ósýi, óńdeýshi ónerkásip salasynda– 106,1%, saýda – 107%, kólik– 104,4%, bailanys – 105,7%, aýyl sharýashylyǵy – 103,3% ulǵaiýy áserin tigizdi. Syrtqy saýda ainalymynyń 24,8%-ke, onyń ishinde importtyń 25%-ke kóbeiýi tikelei qosymsha túsimderge ákeldi. Jergilikti biýdjetterdiń óz kirisi 110 milliard teńgege artyǵymen oryndalyp, 559 milliard teńgeni qurady. Asyra oryndalý somasynyń 77%-i salyqtarǵa keledi. Barlyq óńirde kirister jospary artyǵymen oryndaldy", — dedi ministr.
Sultanovtyń aitýynsha, atalǵan kezeńde respýblikalyq biýdjet shyǵystary 2 265 milliard teńgeni qurady. Olardyń negizgi bóligi áleýmettik mindettemelerdi oryndaýǵa, halyqty nátijeli jumyspen qamtýǵa, aýyl sharýshylyǵyndaǵy kásipkerlerdi qoldaýǵa, "Nurly jer" baǵdarlamasyn iske asyrýǵa baǵyttaldy.
"Sonymen birge biýdjet qarajaty 95 milliard teńgege atqarylmady. Onyń 6,5 milliard teńgesi – únemdeý. Al 88,9 milliard teńge igerilmegen. Bul 2017 jyldyń 1 sáýirindegi kórsetkishten (47 mlrd.teńge) 1,8 ese kóp. Osy somanyń 62,1 milliard teńgesi Qorǵanys ministrligine tiesili. Qomaqty qarjynyń igermeýdiń basty sebebi – memlekettik qorǵanystyq tapsyrystyń 12 aqpan aiynda bekitilýine bailanysty konkýrstardyń kesh ótkizilýi", — dedi ol.
Sondai-aq ol mádeniet jáne sport, ishki ister, aýyl sharýashylyǵy, bilim jáne ǵylym, ádilet ministrlikteri men Ulttyq qaýipsizdik komitetinde 20 milliard teńge igerilmegenin atap ótti.
"Biz bul jyl saiyn kóteremiz. Biraq, aitylǵan memlekettik organdardyń qarjylyq josparlaý men atqarý distsiplinasynyń problemalary jyldan jylǵa qaitalanyp otyr. Bul máselede ortalyqtaǵy qarjy salasyndaǵy áriptesterimizden jergilikti mamandardan úlgi alýǵa shaqyramyn", — dedi ministr.
Onyń aitýynsha, jergilikti biýdjet shyǵystary eseptik kezeńde 823 milliard teńgeni qurady. Oryndalmaǵan biýdjet qarajaty – 20 milliard teńge. Bul kórsetkish byltyrǵy jyldyń osyndai kezeńimen salystyrǵanda 26%-ke jaqsardy (2016 jyldyń 1 sáýiri – 27 mlrd. teńge).
