QR Premer-Ministriniń orynbasary – Saýda jáne integratsiia ministri Baqyt Sultanov «Amanat» partiiasynyń respýblikalyq qoǵamdyq qabyldaýynda birqatar óńir turǵyndaryn qabyldady. Bul týraly primeminister.kz saity habarlady.
Eki saǵattan astam ýaqytqa sozylǵan qabyldaýda Premer-Ministrdiń orynbasary 6 azamattyń máselesin qarady. Astana, Almaty, Qyzylorda jáne Petropavl qalalarynyń, Shyǵys Qazaqstan jáne Aqtóbe oblystarynyń turǵyndary ózderin tolǵandyratyn máselelerin jetkizdi.
Kezdesýde qosylǵan qun salyǵy boiynsha tirkeý shegin tómendetýdi eskere otyryp, qoǵamdyq tamaqtaný salasyndaǵy salyq saiasaty, Kókshetaý qalasy men oblysty gazdandyrý jobasyn júzege asyrý jáne qarjylandyrý tetigin anyqtaý, sondai-aq Almatyda Qytaidan keletin tehnika men qosalqy bólshekterdiń kórmesin ótkizý jáne taǵy basqa máseleler talqylandy.
Baqyt Sultanov ShQO ákimdigine Óskemen qalasy turǵyndaryna arnalǵan, jeke biznes salyp jatqan qysqy oiyn-saýyq keshenine óndiristik infraqurylym júrgizý jáne elektr berý jelisin montajdaý máselesin qaraý merzimin sozbaýdy tapsyrdy.
Qarjy ministrligine «Amanat» partiiasynyń qoǵamdyq qabyldaýlarynda qoǵamdyq tamaqtaný kásiporyndary (QR MKK) úshin salyq salý (arnaiy salyq rejimi jáne QQS boiynsha esepke qoiý) máseleleri boiynsha aýqymdy túsindirý jumystaryn júrgizýdi tapsyrdy. Sondai-aq ol jumysqa «Atameken» UKP tartý qajettigi aityldy.
«Bizdiń kásipkerler QQS rejimi qoǵamdyq tamaqtaný salasynyń barlyq qatysýshylaryna áser etedi dep qaýiptenedi. Búgin Qarjy ministrliginen birneshe kásipker QQS-qa kóshý sharttary boiynsha tolyq túsinikteme aldy. Endi muny naryqtyń barlyq qatysýshylaryna mindetti túrde túsindirý qajet. Oǵan salalyq qaýymdastyqtaryn, birinshi kezekte meiramhana biznesi qaýymdastyǵyn tartý qajet», — dedi B. Sultanov.
Sondai-aq, vitse-premer Aqtóbe ákimdigine qala turǵyny kótergen máseleni sheshý boiynsha (oryndalǵan jumystyń aktilerine qol qoiý biýrokratiia saldarynan uzap jatyr dep shaǵymdandy) bergen tapsyrmasyn partiialyq baqylaýǵa alýǵa shaqyrdy.
Baqyt Sultanov barlyq ótinishterge tolyq jaýap berdi. «Amanat» partiiasynyń qabyldaý bólmesinde kóterilgen barlyq máseleler Premer-Ministr orynbasarynyń jeke baqylaýyna alyndy. Jaýapty tulǵalarǵa tiisti tapsyrmalar berildi.
