2022 jylǵy 16 aqpanda QR Premer-Ministriniń orynbasary – saýda jáne integratsiia ministri Baqyt Sultanov Almaty ákimdiginde saýda, áleýmettik mańyzy bar azyq-túlik taýarlarynyń baǵasyn turaqtandyrý jáne tártipsizdik kezeńinde biznes sýbektilerine keltirilgen shyǵyndy óteý máseleleri boiynsha keńes ótkizdi. Bul týraly Úkimettiń resmi saity habarlady.
Qazirgi kezde Almaty Qazaqstannyń eń iri saýda jáne mádeni ortalyǵy bolyp tabylady. QR-da tirkelgen kásiporyndardyń úshten bir bóligi osy qalada ornalasqan.
«Saýda Almaty ekonomikasynyń negizgi salasy bolyp tabylady. 2021 jyly bólshek saýdanyń ósýi 13,5%, kólemi – 4 trln 212 mlrd teńgeni qurady. QR-nyń bólshek saýda kólemindegi Almatynyń bólshek saýda úlesi 31,5% quraidy», – dedi Baqyt Sultanov.
Premer-Ministrdiń orynbasary – QR saýda jáne integratsiia ministri Baqyt Sultanovtyń aitýynsha, qańtardaǵy oqiǵalar jekelegen biznes sýbektileriniń, ásirese, saýda salasyndaǵy jumysyna teris áser etti.
Búgingi tańda úkimettik komissiia zardap shekken kásipkerlerge keltirilgen shyǵyndy óteý tetigin bekitti, oǵan birqatar ózgerister engizý usynylady. Almaty qalasynyń óńirlik komissiiasy qoldanystaǵy tetikke ózgerister engizýdi usyndy.
Almaty ákimi Erbolat Dosaev málimdegendei, shyǵynnyń barlyq sanattary úshin 10 mln teńgege deiingi tólem somasymen jeńildetilgen esep boiynsha zalaldy óteýdi júzege asyrý, sondai-aq «jabdyq» sanaty úshin jeńildetilgen tetikti qoldaný jáne advokattardyń qyzmetterine aqy tóleýdi óteý usynyldy.
«Bul ótinimderdi qaraý merzimin 1 aidan 2 aptaǵa deiin qysqartýǵa jáne bizneske keltirilgen shyǵyndy óteý rásimin edáýir jedeldetýge múmkindik beredi», – dedi Almaty ákimi Erbolat Dosaev.
Sondai-aq, áleýmettik mańyzy bar azyq-túlik taýarlarynyń baǵasyn turaqtandyrý máselesi talqylandy «Ainalymdaǵy» qaryzdar aiasynda ÁMAT baǵasyn turaqtandyrý úshin jergilikti biýdjetten kókónis, et ónimderi, jumyrtqa jáne bakaleia baǵalaryn belgileý úshin 11 mlrd teńge bólindi. Sondai-aq, áleýmettik nan, sút ónimderi men kúnbaǵys maiynyń iri óndirýshilerine qaryz bólý pysyqtalýda.
Budan basqa, qala ákimdiginde Premer-Ministrdiń orynbasaryna baiandalǵandai, qazirgi kezde ákimdik jeńildikpen qarjylandyrý jáne ýaqytsha saqtaý qoimalaryn salý úshin qala sheginde jer telimderin bólý arqyly shaǵyn habtar qurý múmkindigin qarastyrýda. Bul úi janyndaǵy dúkenderdiń alypsatarlarǵa táýeldiligin tómendetýge, shaǵyn saýda núkteleriniń ielerin iri kóterme saýda bazarlarynda óz betinshe saýda-sattyq jasaý qajettiginen qutqarýǵa múmkindik beredi. Bul tutastai alǵanda shaǵyn ishki dúkenderdegi baǵa deńgeiine oń áser etýi kerek.
Keńes qorytyndysy boiynsha Baqyt Sultanov Almaty ákimdigine jáne QR SIM-niń Saýda komitetine baǵalardy monitoringteý jáne taldaý boiynsha jumysty jalǵastyrýdy, ÁMAT baǵalaryn turaqtandyrý aiasynda «ainalym syzbasyn» ulǵaitý boiynsha sharalar qabyldaýdy, azyq-túlik taýarlaryna baǵa belgileýdiń barlyq tizbegi boiynsha deldaldyq syzbalardy tekserý jónindegi óńirlik komissiialardyń qyzmetin jandandyrýdy, sondai-aq zardap shekken kásipkerlik sýbektilerine kómek kórsetý jáne ótemaqy tóleý jónindegi jumysty jalǵastyrýdy tapsyrdy.
