Atyraýda tórt adamdy óltirdi dep aiyptalǵan Sultan Sársemálievke qatysty sot protsesi jalǵasyp jatyr. 16 maýsymdaǵy sot otyrysynda aiyptalýshydan jaýap alyndy, dep habarlaidy ult.kz.
Sotta Sársemáliev oqiǵaǵa deiingi jaǵdaidy óz nusqasy boiynsha baiandady. Onyń aitýynsha, balalaryna anasy qaraǵan. Al 2025 jyldyń qyrkúieginde áieli Aqbaian Muqanǵalievaǵa birinshi top múgedektigi bar degen anyqtama berilgen. Keiin ony áreketke qabiletsiz dep taný týraly sheshimdi eki ai kútý qajet bolǵan.
Aiyptalýshy sol aralyqta úsh jasar qyzy men áielin alyp, qaiyn jurty turyp jatqan Jangeldin aýylyna barýdy oilaǵanyn aitty. Onyń sózinshe, ol Aqbaiannyń týystarymen sóilesip, jaǵdaidy túsindirmek bolǵan.
«Kózqarasy ózgergen bolar, baryp qaitaiyq dedim. Jaqsy bolsa, Aqbaianǵa qamqorshy retinde sol kisilerdi taǵaiyndaidy dep oiladym. Bardym. Eshteńe oilastyryp barǵan joqpyn. Janymda úsh jasar qyzym bar. Oiyn bilgim keldi», — dedi Sársemáliev.
Onyń aitýynsha, bul 3 qarasha kúni bolǵan. Úige kirgen sátte qaiyn jurty ony jyly qabyldamaǵanyn jetkizdi.
«Úidegi Maqsot Qarabalin, Násip Óteshqalieva, Meiramgúl Qarabalina “sen nege keldiń?” dedi. Esikten kirgen boida qatty sózder aitty. Aqbaian demalsynshy dep, “erteń sóileseiik” dedim de, uiyqtap qaldym», — dedi aiyptalýshy.
Sársemálievtiń sózinshe, tańerteń ony áieliniń ákesi oiatyp, qalǵan balalardy alyp kelýdi talap etken.
«Tańǵy ýaqytta ákesi aiaǵymnan teýip oiatty. “Qalǵan balalar qaida? Olardy alyp kel. Aqbaian osy úide qalady” dedi. Anadai kózqarasty túsinbei qaldym. Beker keldim degen oi boldy», — dedi ol.
Aiyptalýshy qamqorshylyq pen múgedektikke qatysty máseleni túsindirip úlgermegenin aitty. Onyń sózinshe, qaiyn jurty basqa balalardy da ákelýdi talap etip, eger ákelmese, úiine baryp janjal shyǵaratynyn aitqan.
