اتىراۋدا تٶرت ادامدى ٶلتٸردٸ دەپ ايىپتالعان سۇلتان سەرسەمەليەۆكە قاتىستى سوت پروتسەسٸ جالعاسىپ جاتىر. 16 ماۋسىمداعى سوت وتىرىسىندا ايىپتالۋشىدان جاۋاپ الىندى, دەپ حابارلايدى ult.kz.
سوتتا سەرسەمەليەۆ وقيعاعا دەيٸنگٸ جاعدايدى ٶز نۇسقاسى بويىنشا باياندادى. ونىڭ ايتۋىنشا, بالالارىنا اناسى قاراعان. ال 2025 جىلدىڭ قىركٷيەگٸندە ەيەلٸ اقبايان مۇقانعاليەۆاعا بٸرٸنشٸ توپ مٷگەدەكتٸگٸ بار دەگەن انىقتاما بەرٸلگەن. كەيٸن ونى ەرەكەتكە قابٸلەتسٸز دەپ تانۋ تۋرالى شەشٸمدٸ ەكٸ اي كٷتۋ قاجەت بولعان.
ايىپتالۋشى سول ارالىقتا ٷش جاسار قىزى مەن ەيەلٸن الىپ, قايىن جۇرتى تۇرىپ جاتقان جانگەلدين اۋىلىنا بارۋدى ويلاعانىن ايتتى. ونىڭ سٶزٸنشە, ول اقباياننىڭ تۋىستارىمەن سٶيلەسٸپ, جاعدايدى تٷسٸندٸرمەك بولعان.
«كٶزقاراسى ٶزگەرگەن بولار, بارىپ قايتايىق دەدٸم. جاقسى بولسا, اقبايانعا قامقورشى رەتٸندە سول كٸسٸلەردٸ تاعايىندايدى دەپ ويلادىم. باردىم. ەشتەڭە ويلاستىرىپ بارعان جوقپىن. جانىمدا ٷش جاسار قىزىم بار. ويىن بٸلگٸم كەلدٸ», — دەدٸ سەرسەمەليەۆ.
ونىڭ ايتۋىنشا, بۇل 3 قاراشا كٷنٸ بولعان. ٷيگە كٸرگەن سەتتە قايىن جۇرتى ونى جىلى قابىلداماعانىن جەتكٸزدٸ.
«ٷيدەگٸ ماقسوت قارابالين, نەسٸپ ٶتەشقاليەۆا, مەيرامگٷل قارابالينا “سەن نەگە كەلدٸڭ?” دەدٸ. ەسٸكتەن كٸرگەن بويدا قاتتى سٶزدەر ايتتى. اقبايان دەمالسىنشى دەپ, “ەرتەڭ سٶيلەسەيٸك” دەدٸم دە, ۇيىقتاپ قالدىم», — دەدٸ ايىپتالۋشى.
سەرسەمەليەۆتٸڭ سٶزٸنشە, تاڭەرتەڭ ونى ەيەلٸنٸڭ ەكەسٸ وياتىپ, قالعان بالالاردى الىپ كەلۋدٸ تالاپ ەتكەن.
«تاڭعى ۋاقىتتا ەكەسٸ اياعىمنان تەۋٸپ وياتتى. “قالعان بالالار قايدا? ولاردى الىپ كەل. اقبايان وسى ٷيدە قالادى” دەدٸ. اناداي كٶزقاراستى تٷسٸنبەي قالدىم. بەكەر كەلدٸم دەگەن وي بولدى», — دەدٸ ول.
ايىپتالۋشى قامقورشىلىق پەن مٷگەدەكتٸككە قاتىستى مەسەلەنٸ تٷسٸندٸرٸپ ٷلگەرمەگەنٸن ايتتى. ونىڭ سٶزٸنشە, قايىن جۇرتى باسقا بالالاردى دا ەكەلۋدٸ تالاپ ەتٸپ, ەگەر ەكەلمەسە, ٷيٸنە بارىپ جانجال شىعاراتىنىن ايتقان.
