QR Ulttyq mýzeiinde «EKSPO-2017» Halyqaralyq mamandandyrylǵan kórmesi aiasynda «Sultan Beibarys jáne onyń dáýiri» kórmesiniń ashylý saltanaty ótti, dep habarlaidy mýzeidiń baspasóz qyzmeti.
Negizgi derekter boiynsha Beibarys sultan (1223 nemese 1225-1277) Qara teńizden soltústikke qarai «Deshti Qypshaqta» (Qypshaqtar dalasy) dúniege kelgen. XIV ǵasyrdaǵy Mysyr tarihshysy ál-Aini óziniń «Ikdý al-djýman fi tarih ahl al-azman» («Ýaqyt turǵyndary týraly injý alqasy») eńbeginde Beibarys bin Abdýllanyń qypshaq násilinen ekendigi týraly jazǵan. Án-Nývairidyń málimetteri boiynsha, Beibarys túrki jurtynan, qypshaqtyń Elbórili taipasynan shyqqan.
«Qazaqstan úshin, elimiz úshin búgin erekshe kún bolyp tur. Sebebi Sultan Beibarystyń kórmesin alǵash ret elimizge alyp kelip otyrmyz. Osy ýaqytqa deiin Sultan Beibarys týraly kórkem film túsirilip, birneshe spektaklder qoiyldy. Biraq Sultannyń qoly tigen, óz qoltańbasyn qaldyrǵan erekshe jádigerleri elimizge birinshi ret ákelindi. Bul - barshamyz úshin úlken qýanysh, qýanyshymyz qutty bolsyn», - dedi Qazaqstan Respýblikasy Mádeniet jáne sport ministri Arystanbek Muhamediuly.
Beibarys taqta 17 jyl (1260-1277 jj.) otyrdy. Sultan bilik qurǵan jyldary Mysyr qýatty memleketke ainaldy. Arnalar, keme jasaý verfteri, eldiń shekaralarynda áskeri bekinister, Kairde sarailar men meshitter salyndy, qolóneri, eginshilik, ǵylym, saýda, óner salalary damydy.
Arab Respýblikasy Egipet Kóne ister ministrliginiń Islam sektorynyń Tóraǵasy Alsaid Helmi Ezzat Mari Beibarys sultannyń móri ispettes arystan tańbasy bar emblemasyn erekshe atap ótti.
«Osy qasietti jerde týylyp, Mysyr jerine qyzmet etken Beibarys - óte dana sultan. Ol - óziniń batyrlyǵymen, otan súigishtigimen, elin, jerin qorǵaý arqyly álemge tanylǵan sultan. Sizder kýá bolyp turǵan kórmege Sultan ómir súrgen kezeńniń túrli zattary qoiyldy. Mundaǵy basty jádiger - Beibarystyń batyrlyǵyn, sultandyǵyn, erekshe erligin sipattaityn, onyń arystan beinelengen emblemasy», - dedi ol.
Beibarys sultan Palestina men Siriiada Irandaǵy mońǵol elhandaryna jáne eýropalyq kresshilerge toitarys bergen soǵystarymen tanymal. Halyq Abýl-Fýtýh «Jeńisterdiń atasy» dep ardaqtaǵan Beibarys Shyǵystyń kórnekti qolbasshysy.
Kórmege Beibarys sultannyń ómiri men el bileý tarihyn baiandaityn Islam óneri mýzeii (Kair q., Mysyr) jinaǵynan jádigerler qoiyldy.
Kórme 10 tamyzǵa deiin jalǵasady.
