Foto: primeminister.kz
Premer-Ministr Álihan Smaiylovtyń tóraǵalyǵymen ótken Úkimet otyrysynda egin jinaý naýqanyna qatysty ózekti máseleler qaraldy, dep habarlaidy "Ult aqparat" primeminister.kz saityna silteme jasap.
Aýyl sharýashylyǵy ministri Aidarbek Saparov biyl dándi jáne dándi-burshaqty daqyldardy jinaý alańy 17,3 mln ga quraǵanyn baiandady. Búgingi tańda respýblika boiynsha 6,9 mln ga eginniń 40%-y jinaldy. Ortasha ónimdilik – 9,5 ts/ga, 6,6 mln tonna astyq bastyryldy. Ótken jyly dál osy kezeńde astyqtyń 11,6 mln ga nemese 72,8%-y jinalǵan bolatyn.
Bul rette egin naýqany ońtaily aýyl sharýashylyǵy jaǵdaiynda ótkeni, jazǵy aýa-raiy eldiń basym bóliginde qalypty bolǵany atap ótildi. Egin jinaý aldynda tehnikanyń daiyndyǵy 100%-ǵa qamtamasyz etilip, jeńildetilgen JJM jóneltý belgilengen merzimde bastaldy. Sonymen qatar negizgi astyqty aimaqtarda 3 aptadan astam ýaqytqa sozylǵan jaýyn-shashyn saldarynan jańa ónim sapasynyń nasharlaýy jáne astyqtyń ónip ketýine, sondai-aq jalpy dándi daqyldar túsiminiń tómen bolýyna ákeldi.
Aýa-raiynyń qolaisyzdyǵynan zardap shekken barlyq óńirlerde búkil múddeli organdar men uiymdardy qosa otyryp, zardaptardyń aýqymyn anyqtaý úshin jumys komissiialary quryldy. Búginde barlyq zardap shekken óńirlerge sapar jasalyp, egin jinaý jumystarynyń barysyna taldaý júrgizildi. Ákimdikterdiń málimeti boiynsha, alqapta ósken astyq 2,7 mln ga, bul jalpy egin jinaý alańynyń 15%-yn quraidy. Qazirgi ýaqytta barlyq óńirlerde tehnikalar egis alqabyna jappai shyqty, oraq jumystary jalǵasyp jatyr.
Negizgi astyqty óńirlerdegi jaǵdai týraly Aqmola oblysynyń ákimi Marat Ahmetjanov, Qostanai oblysy ákiminiń orynbasary Erlan Spanov jáne Soltústik Qazaqstan oblysy ákiminiń birinshi orynbasary Marat Tasmaǵanbetov baiandama jasady.
Premer-Ministr egin jinaý naýqanynyń barysy Úkimettiń turaqty baqylaýynda ekenin atap ótti.
«Ózderińiz biletindei, biylǵy jyl elimizdiń eginshileri úshin qolaisyz boldy. Jazdyń 2 aiyndaǵy aptap ystyqtyń sońy kúzgi jaýyn-shashynǵa ulasty. Bul árine, astyqtyń túsimin azaityp, jumys qarqynyn edáýir báseńdetip jiberdi. Degenmen egin jinaý naýqanyn qarjylai jáne materialdyq-tehnikalyq jaǵynan qamtamasyz etý úshin barlyq qajetti sharalar qabyldandy. Astyqty óńirlerde osy aidyń sońyna deiin qatty jańbyr jaýady degen boljam joq. Sondyqtan osy merzim ishinde barynsha úlgerip qalý kerek», — dedi Álihan Smaiylov.
Ol elimizdiń soltústik óńirlerindegi aýa-raiynyń qolaisyzdyǵyna bailanysty Memleket basshysy Úkimetke astyq óndiretin fermerler men sharýa qojalyqtaryna qajetti kómek kórsetýdi tapsyrǵanyn eske saldy.
«Energetika ministrligi astyqty keptirý úshin qosymsha kólemde dizel otynyn bóletin bolady. «Báiterek» holdingi nesieler boiynsha qaryzdardy qaita qurylymdap, qolaisyz aýa-raiynan zardap shekken fermerler úshin aiyppul sanktsiialaryn salmai, Azyq-túlik korporatsiiasynyń jelisi arqyly taýarlyq nesie merzimderin uzartyp otyr. Aýa-raiynyń qolaisyzdyǵy fors-majorlyq jaǵdai retinde tanylýy tiis. Sýbsidiialardy tolyq kólemde tóleý kerek», — dep atap ótti Premer-Ministr.
Úkimet basshysy astyq qabyldaý pýnktterimen jáne astyqty keptirýmen ainalysatyn kásiporyndarmen táýlik boiy jumys isteýin qamtamasyz etýiin talap etti. Bul rette ol tarifterdiń kóterilýine jol bermeý jóninde sharalar qabyldaý qajettigin atap ótti.
Sonymen qatar Premer-Ministr astyqty keptirý úshin bir litri 250 teńgeden aspaityn baǵamen qosymsha kólemde dizel otynyn bólýdi qamtamasyz etýdi, agroónerkásip keshenin sýbsidiialaý úshin qosymsha qarajat bólý jumystaryn júrgizýdi, atap aitqanda, Biylǵy azyq-túliktik jáne jemdik astyqty tikelei satyp alý úshin Azyq-túlik korporatsiiasynyń jarǵylyq kapitalyn ulǵaitý máselesin pysyqtaýdy tapsyrdy.
«Biz búgin Jambyl oblysynyń sharýalaryna shyǵyndy óteý úshin Úkimet rezervinen qarjy bólý týraly qaýly qabyldaimyz. Qarjy ministrligi men óńir ákimdigi oblystyń zardap shekken eginshilerine tólemderdiń tez arada bólinýin qamtamasyz etýi tiis», — dedi Álihan Smaiylov.
Sonymen qatar Premer-Ministr astyq tasityn vagondarmen ýaqtyly qamtamasyz etip, temirjoldaǵy uzyn-sonar kezekti boldyrmaýdy talap etti.
«Bizdiń mindetimiz – egindi sapaly jinap alýdy qamtamasyz etý», — dep túiindedi ol sózin.
