QR IIM Tótenshe jaǵdailar komitetiniń tóraǵasy Vladimir Bekker sý tasqynyna qatysty jaǵdaidyń turaqtalǵanyn málimdedi, dep habarlaidy QazAqparat tilshisi.
«Qazaqstan boiynsha sý tasqynynyń qaýipti kezeńi artta qaldy. Búginde barlyq ózenderde sý deńgeiiniń tómendep jatqany baiqalady. Atap aitqanda, Aqmola oblysyndaǵy Jabai ózeninde sý deńgeii 2 metr 30 santimetrdi qurap otyr. Bir táýliktiń ishinde sý 50 sanimetrge tómendedi. Atbasar qalasyna qaýip tónip turǵan joq. Astrahan aýdanyndaǵy Kolýton ózeniniń deńgeii de tómendep keledi», - dedi V.Bekker elordada ótken baspasóz máslihatynda.
Onyń aitýynsha, Ertis ózenindegi muz keptelisi de Pavlodar oblysy arqyly ótip barady. Resei Federatsiiasynyń shekarasyna deiin 30 shaqyrymdai qaldy.
«Shúlbi qoimasynan jiberiletin sýdyń kólemi sol qalpy sekýndyna 1 296 tekshe metrdi qurap otyr. Odan Ertistiń deńgeii kóterilgen joq. Al Shyǵys Qazaqstan oblysynyń Besqarai aýylynda úsh jeke úidi sý basty. Negizi, ol úilerdiń turǵyndaryn múldem basqa jerge kóshirgen durys. Sebebi, atalǵan problema jyl saiyn qaitalana beredi. Olar jer asty sýlary kóteriletin jerde turady. Sondyqtan, qazir sýdy sorsa da, basqa jerge aidasa da, nátije bolmaidy. Báribir sýdyń ketkenin kútý kerek», - dep atap kórsetti V.Bekker.
Soltústik Qazaqstan oblysynda Esil ózeni arqyly Sergeev sý qoimasyna keletin sýdyń kólemi de azaiyp keledi. Kúni keshe qoimaǵa sekýndyna 778 tekshe metr sý kelse, bir táýliktiń ishinde atalǵan kórsetkish 328 tekshe metrge deiin tústi. Esil ózeni boiymen ornalasqan aýyldardy sý basqan joq.
«Degenmen, áli de bir aptadai Aqmola, Shyǵys Qazaqstan, Pavlodar jáne Soltústik Qazaqstan oblystaryn baqylaýda ustaityn bolamyz», - deidi V.Bekker.
