Qaraǵandyda birazdan aitylyp kele jatqan biznes-inkýbatorlar qurý máselesi aqyry oń sheshimin tabatyn sekildi. Tehnikalyq jáne kásibi bilim máseleleri jónindegi aimaqtyq keńeste jariia bolǵan bul bastamany sol kezde oblys ákimi Nurmuhambet Ábdibekov te qoldap, bilim berý, kásipkerlik jáne jastar saiasaty basqarmalaryna osy jobany qolǵa alýdy tapsyrdy.
Alaida, jastardy tapsyrma júktelgen jaýapty oryndardan buryn biznesmender qoldaýǵa niet bildirip, olar jaqynda kolledj basshylarymen jáne bilim berýdi damytýdyń oqý-ádistemelik ortalyǵy ókilderimen kezdesý ótkizdi.
– Kásipker bolǵysy keletin jastar az emes, biraq soǵan jetýdiń jolyn bilmeidi, – deidi oqý-ádistemelik ortalyǵy direktorynyń orynbasary Dana Asaqaeva. – Sondyqtan, olarǵa mundai jaǵdaida biznes-inkýbator kómektese alady. Bul joba qazirgi basty problemalardyń biri – jumyssyzdyq máselesin sheshe alar edi. Stýdentter arasynda kásipkerlikti damytý jańa jumys oryndaryn ashýmen qatar, biznes áleminiń jańa kórnekti ókilderin ómirge ákeledi degen úmitimiz bar.
Kezdesýge Qaraǵandy oblysy kásipkerler qaýymdastyǵynyń prezidenti Ermek Ábildin, sonymen qatar, Tólegen Áshimov, Stepan Vadiýnin, Qabdolla Bismildin siiaqty jergilikti tanymal kásipkerler qatysty. Isker jandar da oqý oryndarynan biznes salasynda laiyqty izbasarlar shyǵatynyna senimdi. Olar stýdent jastardy kásipkerlik jolyna úiretip, bilgen aqyl-keńesterimen bólisýge daiyn.
Jumysshy mamandyqtaryna oqytatyn tehnikalyq-qurylys kolledjiniń ǵimaratynda ótken seminarǵa qatysqandardyń deni – burynǵy kásiptik-tehnikalyq ýchilishelerdiń basshylary. Kásipker, Qaraǵandy oblystyq máslihatynyń depýtaty Tólegen Áshimov aitqandai, qoǵamdaǵy negizgi qozǵaýshy kúsh te búgingi jumysshy jáne orta tap. Onyń ústine, kóp nárse kásiporyn injenerleri men direktorlaryna emes, jumyskerlermen qoian-qoltyq eńbek etetin brigadirlerge bailanysty. Óitkeni, óz kásibiniń qyr-syryn meilinshe jetik biletin solar.
– Biz birinshi kezekte qazir Qazaqstannyń iri kásiporyndarynda jemisti jumys atqaryp júrgen burynǵy túlekterimizben bailanys ornatýymyz kerek. Stýdentti tájiribege, saliqaly iske tartýǵa bolatyn-bolmaitynyn solar anyqtai alady, – deidi Tólegen Áshimov.
Iá, ómir kórgen, ómirdiń tezin kórgen ustazdan tálim alǵan shákirtter erteń-aq óz jolyn tabary anyq. Sony osy jiynda Kásipkerler qaýymdastyǵynyń prezidenti Ermek Ábildin de aitty.
– Stýdentter biznesin damytý jumyspen qamtý máselelerin de shesher edi, – deidi ol. – Onyń ústine, memleket bizge biznespen jáne jumyspen qamtýdyń jol kartalary túrindegi barlyq múmkindikti jasap otyrǵanyn esten shyǵarmaǵanymyz abzal…
Ermek Tóleýuly bul jobanyń qalai jumys isteýi qajettigin de táptishtep ótti. Kolledj basshylarynan keregi – sabaq ótkizý oryndary, pedagogtar men stýdentter. Al jekelegen kompaniia ókilderi olarǵa óz aqyl-keńesterin, jón-jobalary men usynystaryn aita keledi. Olar jastarǵa biznes-jospar jasaý amaldaryn, alym-salyqtyń ne ekenin úiretip, eń bastysy, jumys berýshige táýeldi bolmaý joldaryn túsindirer edi.
Osy seminardyń tehnikalyq-qurylys kolledjinde ótkizilýi bekerden emes. Dál osy oqý ornynda ádettegi jasóspirimdermen qatar múmkindigi shekteýli jas óskinder de bilim alýda. Kolledjdiń elý shaqty stýdenti kembaǵal: biriniń qulaǵy estimese, endi biriniń kórý qabileti tómen jáne basqadai. Áitse de, kolledj direktory Svetlana Balabekovanyń aitýynsha, olardyń qai-qaisysy da óz bolashaǵynyń jarqyn bolaryna senedi. Kolledjde biznes-inkýbator qurýdy bul kisi de qoldap otyr. Óitkeni, erteń-aq óte shyǵatyn oqý merziminen soń, on eki múshesi din aman túlekterdiń ózi qaida bararyn bilmei tosylady.
Uzyn sózdiń qysqasy, biznes-inkýbator jasaýdyń qanatqaqty jobasy osy tehnikalyq-qurylys kolledjinde iske qosylatyn boldy. Munda oǵan kerek jaǵdaidyń bári de bar. Endi tek kásipkerlerdiń jan-jaqty qoldaýy ǵana qajet. Sátin salsa, qazaqstandyq bizneste urpaqtar sabaqtastyǵy degen uǵym qalypqa ainalatyn kún de týatyn siiaqty. Bul, árine, qoǵam igiligine qyzmet eter úrdis bolar edi.
Qairat ÁBILDINOV,
«Egemen Qazaqstan»
QARAǴANDY
.jpeg)