Vengriianyń Sombathei qalasynda sporttyq gimnastikadan Álem kýbogi kezeńi aiaqtaldy, dep habarlaidy "Ult aqparat".
QR Ulttyq Olimpiada komitetiniń málimetinshe, Majar elinde ótken bairaqty doda Qazaqstan sportshylary úshin jemisti ótti. El gimnastary tórt medal enshilese, sonyń ishinde Nariman Qurbanov jeńistiń joǵarǵy satysynan kórindi.
Ulttyq quramanyń bas bapkeri Aleksandr Kimniń aitýynsha, Vengriiadaǵy álem kýbogi kezeńine 14 eldiń kil myqty sportshylary qatysty.
«Aziia qurlyǵynan tek Qazaqstan ǵana bardyq. Izrail, Frantsiia, Belarýs, Grekiia men Slovakiia sportshylary ótinim bergenimen, indetke bailanysty kele almady. Erler arasyndaǵy synda árbir snariadta 10 men 20 aralyǵynda gimnastar baq synady. Al finalǵa tek 8 sportshy joldama alatyny belgili. Jarysqa qatysqan tanymal sportshylar qatarynda Olimpiada, álem jáne Eýropa chempionaty men Eýropa oiyndarynyń jáne álem kýbogi kezeńderiniń jeńimpazdary men júldegerleri bar. Atap aitar bolsaq, Marian Dragýleský(Rýmyniia), Filipp Ýde (Horvatiia), Tin Sirbich (Horvatiia), Petro Pahniýk (Ýkraina), Robert Seligman (Horvatiia), Rok Klavora (Sloveniia), Maksim Djenkins (Belgiia) jáne taǵy basqalary bizdiń sportshylarǵa qarsylas atandy», - deidi bas bapker.
Qazaqstan namysyn qorǵaǵan Nariman Qurbanov, Iliias Azizov pen Milad Karimi birneshe jattyǵý boiynsha finalǵa joldama aldy.
Nariman gimnastikalyq at snariadynda irikteýde de, finalda da ozyq shyqty. Altyn júldege talasta ol Horvatiia jáne Albaniia sportshylarynan basym tústi. Taǵy bir jas sportshy
Iliias Azizov erkin jattyǵýda besinshi nátijemen finalǵa ótip, sheshýshi synda kúmis medaldi mise tutty.
Erkin jattyǵýdaǵy irikteý synyn birinshi orynmen aiaqtaǵan Milad Karimi finalda qatelik jiberdi. Ol birinshi jáne sońǵy akrobatikalyq ádisterdi oryndaý kezinde júldeden qaǵyldy. Alaida Milad qossyryq pen kermedegi jattyǵýda kúmis medalǵa qol sozdy.
