Sot júiesin túbegeili qaita qurý isine jáne ony sapaly júzege asyrýǵa basa mán bergen jón. Bul týraly QR sýdialarynyń VIII sezinde Memleket basshysy Qasym-Jomart Toqaev aitty, dep habarlaidy QazAqparat.
«Sottar táýelsizdigi ólshemi boiynsha biz 71-oryndy ielendik. Al zań ústemdigi indeksi boiynsha 62-orynǵa taban tiredik. Alaida ahýaldy túbegeili ózgertip, sotqa degen senimdi arttyrý úshin jumysty jalǵastyra berýimiz kerek. Biylǵy Joldaýymda quqyq qorǵaý jáne sot júiesin reformalaý qajettigi týraly aittym. Osyǵan orai meniń tapsyrmam boiynsha arnaýly komissiia qurylyp, tiisti jumystar bastalyp ketti. Búgin osy máselelerge toqtalsam deimin. Eń aldymen sot júiesindegi úderisterge azamat, kásipker, investor múddesi turǵysynan qaraý kerek», - dedi Qazaqstan Prezidenti.
Memleket basshysy bizdiń zańdarymyzdyń sheteldiń ozyq zańdarynan aitarlyqtai ózgeshiligi joq ekendigin basa aitty.
«Bar aiyrmashylyq ony túsiný jáne qoldaný tásilinde. Damyǵan memleketter sot júiesin reformalaý barysynda basqarý ǵylymyn utymdy paidalanady. Onda adami resýrsqa, biznes úderisterdiń qisyndy bolýyna, zamanaýi tehnologiiaǵa basymdyq beriledi. Bir sózben aitqanda, barlyǵy da adamǵa qolaily bolýy úshin jasalǵan. Biz sot salasyndaǵy reformalardy birtindep júzege asyryp kelemiz. Biraq naqty iske kelgen kezde, ásirese, saqtyqqa boi aldyramyz. Tipti, ókilettik úshin ózara talas júrip, igi bastamanyń berekesi ketip qalady. Sonyń saldarynan eleýli ózgeriske qol jetkize almai otyrmyz. Al azamattarǵa, qoǵamǵa naqty nátije kerek. Bul aiqyn nárse. Sondyqtan sot júiesin túbegeili qaita qurý isine jáne ony sapaly júzege asyrýǵa basa mán bergen jón», - dedi Qasym-Jomart Toqaev.
