Sot maltalyq zańger Pio Valettany Avstriia túrmesinde qaitys bolǵan qazaqstandyq burynǵy oligarh Rahat Álievtiń jesiri Elnara Shorazovaǵa 300 myń eýro ótemaqy tóleýge mindettedi. Shorazova zańgerdi "900 myń eýrony zańsyz iemdenip aldy" dep aiyptaǵan. Bul jóninde 1 qarashada Malta Today basylymy jazdy, dep habarlaidy Azattyq.
Osy isti Malta azamattyq sotynda qaraǵan sýdia Robert Mangionnyń aitýynsha, Shorazova 2010 jyly Valettaǵa 2,4 million eýro aqsha berip, A&P Power Ltd atty kompaniiaǵa tirkelgen Sent Kits jáne Nevis atyndaǵy shotqa depozit retinde aýdarýyn suraǵan.
Biraq 2011 jyly Valettanyń tek 2,2 mln eýrony ǵana depozitke salǵany, izinshe odan taǵy 700 myń eýro alǵany anyqtalǵan.
Valetta muny kásibi qyzmetine alǵan aqy dep túsindirgen, al Shorazova ony joqqa shyǵarǵan. Izinshe Shorazova sotqa aryz túsirip, zańgerden 900 myń eýro óndirip almaq bolǵan. 2012 jyly taraptar kelisimge kelip, soǵan sáikes Valetta oǵan jetpegen somany alty jyl ishinde tóleýge mindettengen. Kelisim boiynsha, Valetta barlyǵyn ýaqytynda tólese – 600 myń eýro, bir tólemniń ózin keshiktirse tolyq kólemde – 900 myń eýro tóleýi tiis bolǵan. Al Shorazova Valettanyń tek bir ret qana merziminen buryn tólem jasaǵanyn aitqan.
Valetta sotta Shorazovany oqiǵany burmalady dep aiyptap, mundai kelisimdi Shorazovamen emes, Rahat Álievtiń ózimen jasasqanyn alǵa tartqan. Basylymnyń jazýynsha, Valetta osy oqiǵa boiynsha buryn qylmystyq iske tartylǵan. 2017 jyly Shorazova "qaýipsizdigine alańdap" Maltaǵa kýálik berýge kele almaǵandyqtan, Valetta aqtalyp shyqqan.
Biraq osy jolǵy azamattyq iste Shorazovanyń ózi Maltaǵa kelmese de, onyń advokaty Lýis Kassar Pýllichino kórsetken dálelderdi sýdia Robert Mangion jetkilikti dep taýyp, Valettany 300 myń eýro tóleýge mindettegen.
Qazaqstan UQK tóraǵasynyń burynǵy birinshi orynbasary, Qazaqstannyń Avstriiadaǵy burynǵy elshisi, eks-prezident Nursultan Nazarbaevtyń burynǵy kúieý balasy Rahat Áliev 2010 jyly Maltaǵa kóship baryp, 4 jyldai turǵan. Malta Today jazýynsha, 2007 jyly Avstriiada júrgende Nazarbaevtyń qyzynan kúshtep ajyratylǵan Áliev birneshe jyldan soń jańa áieli Elnara Shorazovamen birge Maltaǵa qonys aýdarǵan. 2014 jyly Qazaqstan úkimetiniń suraýy boiynsha Malta soty Álievtiń dúnie-múlkin, sonyń ishinde iahtasy men kompaniialaryn buǵattaǵan. Rahat Áliev Malta sotynyń sheshimine qarsylyq bildirgen. Biraq 2015 jyly aqpanda Vena túrmesinde jumbaq jaǵdaida qaitys boldy. Avstriia biligi Áliev ózine qol salǵan degen tujyrym jasaǵan.
Malta Today basylymynyń jazýynsha, Áliev Maltada júrgende ózin Qazaqstan biligi qýdalap jatqanyn málimdep, qaýipsizdigine alańdaǵan. Biraq synshylar ol Maltada turaqty turýǵa múmkindik alyp, qajetti dárejede baqylaýǵa ilinbedi dep synaǵan.
Biyl Eýropanyń adam quqyqtary soty Elnara Shorazovanyń ótinishin qanaǵattandyryp, Malta úkimetin Rahat Álievtiń jesirine 2 myń eýro tóleýge mindettegen. Shorazova Malta biligin "Qazaqstan úkimetiniń suraýy boiynsha aktivterimdi buǵattap, quqymdy buzdy" dep aiyptaǵan.
