Sońǵy eki jyldaǵy eki iri órtten kelgen zalaldardyń somasy 182 milliard teńgeni quraǵan jáne 100 myń gektardan astam orman joiyldy. Bul týraly búgin Parlament Májilisinde ótken Úkimet saǵatynda depýtat Edil Jańbyrshin aitty, dep habarlaidy "Ult aqparat".
«Ormandy qalpyna keltirýge kemi shamamen 20-30 jyldai ýaqyt ketedi. Al, osy is-sharalarǵa irilendirilgen esepteýler boiynsha 150,9 milliard teńge qajet bolady. Iaǵni jalpy shyǵyn shamamen 384 milliard teńgeni qurap otyr.
«Sarań eki tóleidi» degen sóz bar. Jalpy shyǵyn qajetti somadan bes jarym ese asyp tur. Úkimet qajetti somany tez arada sheship, búkil materialdyq-tehnikalyq bazany rettep alǵany tiimdi emes pe? Bul memleket úshin de, tabiǵat úshin de paidaly bolatyny aitpasada túsinikti», - deidi Edil Jańbyrshin.
Al, azamattyq qorǵaý salasyndaǵy birinshi kezektegi sharalardyń 2023-2027 jyldarǵa arnalǵan keshendi josparyna sáikes respýblikanyń barlyq orman sharýashylyqtaryn materialdyq-tehnikalyq jaǵynan qamtamasyz etý úshin 68 milliard teńge qajet eken.
Depýtat Orman sharýashylyǵy komitetiniń jumysy kóńil kónshitpeitinin aityp otyr.
«Sońǵy eki jylda tabiǵatty qorǵaý mekemeleriniń obektilerinde 80-nen astam tekserý josparlanǵanymen, tek bir ǵana tekserý bolǵan. Basqasha aitqanda, Komitet respýblika óńirlerindegi naqty ahýaldan jáne naqty máselelerden habarsyz deýge bolady. Bul keshendi tekserý josparlaryn jasaý kezinde Komitet basshylyǵynyń ózekti ári mańyzdy máselelerdi eskermeitinin jáne osy salada qalyptasqan jaǵdaidan beihabar ekenin kórsetip otyr», - deidi E. Jańbyrshin.
Depýtat óz sózinde orman sharýashylyqtaryn materialdyq-tehnikalyq jaǵynan qamtamasyz etý áli de ózekti bolyp otyrǵanyn aitty.
«Ótken jyly Abai oblysynda bolǵan órttiń taldaýy kórsetkendei, arnaiy tehnikalar órt ornyna jete almady. Óitkeni tehnika parki ótken ǵasyrdyń 70-80 jyldary shyǵarylǵan kólikterden quralǵan, materialdyq-tehnikalyq baza ishinara bolsa da jańartylmaǵan. Osynyń saldarynan 2023 jyly oryn alǵan órtti der kezinde aýyzdyqtaýǵa Qoryq daiyn bolmai shyqty. Prokýratýranyń málimeti boiynsha Shyǵys Qazaqstan oblysynyń orman sharýashylyqtaryn jabdyqtaý 40% deńgeiinde. Qazirgi tańda 6,8 milliard teńge qajet etetin 2260 órt sóndirýge arnalǵan tehnika men jabdyqtar qajet, 44 órt sóndirý beketiniń 5-ýi tehnikanyń buzylýyna bailanysty jumys jasamaidy», -deidi depýtat.
