Soltústik Koreia túrmesinde bir jyldan astam ýaqyt qamaýda bolǵan amerikalyq stýdent Otto Ýormber qaitys boldy. Bul týraly onyń ata-anasy habarlady. Soltústik Koreiada komaǵa túsken Ýormber birneshe kún buryn AQSh-qa qaitarylǵan edi.
"Amal ne, ulymyzdyń soltústik koreialyqtardan kórgen adam tózgisiz azaby qaiǵyǵa dýshar etti" delingen ata-anasy Sindi jáne Fred Ýormberdiń málimdemesinde. AQSh prezidenti Donald Tramp Otto Ýormberdiń týystary men jaqyndaryna kóńil aitty. "Meniń ákimshiligim Ottonyń basyna túsken taǵdyrdan zań ústemdigi men qarapaiym ǵana adami qundylyqtardy elemeitin rejimderdiń qolynda beikúná adamdardyń mundai qaiǵyǵa tap bolýynyń aldyn alýdaǵy batyldyǵyn eselep jiberdi" dedi Tramp.
Yqpaldy senator Ben Kardin Soltústik Koreia rejimin "taǵylyq áreketin jalǵastyryp otyrǵany" úshin jaýapqa tartý qajetin málimdedi. "AQSh óz azamattarynyń jaý elderde qaza tapqanyna tóze almaidy" dedi senator Djon Makkein.
Otto Ýormberdiń qazasyn eki kúnnen soń Vashingtonda kezdesetin AQSh pen Qytaidyń syrtqy ister jáne qorǵanys ministrleri talqylaidy degen boljam bar. AQSh Otto Ýormber Soltústik Koreiada qamaýda otyrǵanda oǵan ne bolǵanyn anyqtaý úshin Qytaidyń kómegine júginbek niette.
Amerikalyq birneshe kongresmen amerikalyqtardyń Soltústik Koreiaǵa týristik maqsatta barýyna tyiym salyp, litsenziia arqyly ǵana saparlaityn ereje engizýdi usyndy.
Virdjiniia ýniversitetiniń 22 jastaǵy stýdenti Otto Ýormberge 2016 jyly naýryzda 15 jyl májbúrli eńbekke jegilý jazasy kesilgen edi. Ol Soltústik Koreiada bolǵanynda qonaqúide qabyrǵada ilinip turǵan saiasi plakatty jyrtyp tastaǵany úshin qamalǵan. Ýormbierdiń soty bir-aq saǵat bolǵan. Sodan beri ony kópshilik aldyna shyǵarmaǵan. Ýormberdiń ne sebepti komaǵa túskeni ázirge belgisiz. Amerikalyq dárigerler Soltústik Koreia biliginiń Ýormber botýlizmmen aýyryp komaǵa tústi degen resmi tujyrymyn joqqa shyǵarady. Amerikalyq BAQ-tyń habarlaýynsha, Vashitngton Ýormberdiń qazasyna jaýap sharalary retinde Phenianǵa jańa sanktsiialar salýy múmkin.
