Soltústik Koreia Tokioda ótetin jazǵy Olimpiada oiyndaryna qatyspaidy. Bul týraly "Renhap" agenttigine siltegen "Interfaks" habarlady.
Olimpiadaǵa qatyspaý týraly sheshim 25 naýryzda Phenianda ótken Soltústik Koreianyń olimpiada komitetiniń bas assambleiasynyń otyrysynda qabyldanǵan.
"Koreia halyqtyq-demokratiialyq respýblikasy sportshylaryn koronavirýspen bailanysty ǵalamdyq daǵdarystan qorǵaý maqsatynda 32-Olimpiada oiyndaryna qatyspaý týraly sheshim qabyldady" dep agenttik eldegi sport portalyndaǵy aqparattan úzindi keltiredi.
Olimpiada jáne Paralimpiada oiyndary byltyr jazda Tokioda ótýi tiis bolǵan, alaida koronavirýs indetine bailanysty 2021 jylǵa shegerilgen edi. Biyl Olimpiada – 23 shilde men 8 tamyz aralyǵynda, Paralimpiada 24 tamyz ben 5 qyrkúiek aralyǵynda ótedi.
AP agenttiginiń jazýynsha, Ońtústik Koreia biligi Tokio olimpiadasy eki el arasyndaǵy qarym-qatynasty jaqsartý múmkindigi bolatyn dep málimdep, kórshi eldiń mundai sheshim qabyldaǵanyna ókinish bildirdi. Eki Koreia arasyndaǵy jaǵdai Vashington men Phenian arasyndaǵy iadrolyq kelissózder tyǵyryqqa tirelgen shaqta ýshyqqan.
Soltústik Koreia ótken aida bir jylǵy "úzilisten keiin" qysqa qashyqtyqqa ushatyn eki zymyranyn synap, Vashingtonnyń reaktsiiasyn baǵamdaý maqsatynda taǵy bir márte qarýyn pash etken.
