Soltústik Koreia 18 qarashada qurlyqaralyq ballistikalyq zymyranyn synady. Ol, shamamen, Japoniiadan 200 shaqyrym jerge qulaǵan.
Jýrnalisterdiń suraqtaryna jaýap bergen Japoniianyń resmi tulǵalary synalǵan zymyrannyń AQSh aýmaǵyna jetýge shamasy baryn aitty.
Tokiodan bólek, Soltústik Koreianyń zymyran synaǵy jóninde Ońtústik Koreia biligi de habarlady.
Bir kún buryn Soltústik Koreia qysqa qashyqtyqqa ushatyn ballistikalyq zymyranyn synap, aimaqtaǵy odaqtastarymen qaýipsizdik salasynda ózara bailanysty nyǵaitýǵa kúsh salyp otyrǵan AQSh-tyń talpynysyna "qatań jaýap beretinin" eskertken. Phenian Vashington "keiin ókinetin avantiýraǵa baryp otyr" dep málimdegen.
Soltústik Koreia biyl kóp synaq ótkizip, rekord jasady. Jýyrda AQSh pen Ońtústik Koreia jattyǵý ótkizip jatqan kezde teńizge júzdegen artilleriiamen oq atqan. Manevrlerdiń keibirine Japoniia da qatysqan.
Jeksenbide Ońtústik Koreia prezidenti Iýn Sok El, Japoniia premer-ministri Fýmio Kisida men AQSh prezidenti Djo Baiden Kambodjadaǵy kelissózde áskeri yntymaqtastyqty arttyrýǵa kelisken.
AQSh ulttyq qaýipsizdik keńesiniń resmi ókili Edrien Ýotson Soltústik Koreianyń sońǵy zymyran synaǵy jóninde málimdeme taratyp, Pheniannyń áreketi BUU Qaýipsizdik keńesiniń kóptegen rezoliýtsiiasyn óreskel buzatynyn, aimaqtaǵy jaǵdaidy ýshyqtyryp, turaqsyzdyq týyndatatynyn málimdegen.
"Bul qadam Soltústik Koreianyń burynǵysha óziniń jappai joiý qarýlary men zymyran qurý boiynsha zańsyz baǵdarlamalaryn damytýǵa basymdyq beretindigin dáleldeidi" dedi Ýotson.
