Soltústik Qazaqstan oblysynda 1 aqpannan beri 990 adam koronavirýsqa qarsy vaktsina aldy, ekpe egilgenderdiń jaǵdaiy jaqsy, dep habarlaidy "Ult aqparat".
Jalpy tájiribe dárigeri Denis Brestiń koronavirýsqa qarsy ekpe alǵanyna búgin altynshy kún.
Petropavldaǵy № 1 emhananyń mobildi top quramynda jumys isteitin meditsinalyq qyzmetkerge ekpe alǵashqy lekpen salyndy.
Sózine qaraǵanda, qazir jaǵdaiy jaqsy, kúndelikti jumysyn atqaryp júr.
«3 aqpan kúni vaktsina aldym. Sol kúni keshke dene qyzýym 37 gradýsqa deiin kóterildi. Kádimgi paratsetamoldy ishkennen keiin temperatýra tústi. Tańerteń turǵanda ystyǵym bolǵan joq, biraq ózimdi álsiz sezindim. Inektsiia salǵan jer aýyryńqyrady. Al túske qarai munyń bári basylyp, aǵzamda basqa ózgeris bolǵan joq», - deidi dáriger.
Denis Bres ótken jyldyń sáýir aiynan koronavirýs juqtyrǵan syrqattarmen jumys istep keledi.
Bastapqyda emhanada filtrde otyryp, naýqastardy qabyldady. Al maýsym aiynan beri mobildi top quramynda.
«Tańerteń shaqyrtýlarmen ketemiz, túski asymyzdy ishkennen keiin qaita jumysymyzdy jalǵastyramyz. Koronavirýstyń jeńil túrin juqtyryp, úiinde em alyp jatqandar da bizdiń baqylaýymyzda.
Saqtanǵandyqtan shyǵar, ári sáttilik joldas boldy ma - buǵan deiin qaýipti virýsty juqtyrǵan joqpyn. Biraq bel ortasynda júrgendikten erte me, kesh pe aýyrýym múmkin. Sol sebepti vaktsina qoidyrýǵa sheshim qabyldadym. KVI-di juqtyrǵan jaǵdaida da ekpeden keiin ol jeńil ótedi, immýnitet qalyptasady», - deidi meditsina qyzmetkeri.
Jalpy SQO-ǵa 1 aqpan kúni KVI-ge qarsy 1200 doza vaktsina jetkizilgen edi.
SQO densaýlyq saqtaý basqarmasy baspasóz qyzmetiniń málimetinshe, búginge deiin 990 adam vaktsina alyp úlgerdi.
Olar negizinen koronavirýspen kúreste aldyńǵy shepte júrgen meditsina qyzmetkerleri.
