QR Premer-Ministri Álihan Smaiylov Eýraziialyq úkimetaralyq keńes otyrysynda Resei Federatsiiasy Úkimetiniń basshysy Mihail Mishýstinmen ekijaqty kelissóz júrgizdi, dep habarlaidy "Ult aqparat" primeminister.kz-ke silteme jasap.
Taraptar birqatar ózekti máselelerdi, atap aitqanda, saýda-ekonomikalyq, tranzittik-kóliktik yntymaqtastyq, ónerkásiptik jáne otyn-energetikalyq keshen, tsifrlandyrý, ǵarysh salasy jáne t. b. qatysty máselelerdi talqylady.
Resei Federatsiiasy – Qazaqstannyń negizgi saýda-ekonomikalyq seriktesi. 2021 jyly eki el arasyndaǵy taýar ainalymynyń ósimi 29%-dy qurady.
Smaiylov agroónerkásip keshenindegi qarqyndy ósimdi atap ótti.
«Ótken jyly AÓK-tegi ózara is-qimyl 32%-ǵa artty. Sonymen qatar bul sala úlken áleýetke ie. Saýdany, onyń qurylymyn ulǵaitý, jetkiziletin taýarlar nomenklatýrasyn keńeitý jumystaryn jalǵastyrýdy usynamyz. Reseilik agroónerkásiptik biznesti tyǵyz yntymaqtastyq ornatýǵa shaqyramyz», — dedi Á. Smaiylov.
Tranzittik-kóliktik yntymaqtastyq máselelerin talqylai otyryp, Qazaqstan Premer-Ministri «Eýropa – Batys Qytai» halyqaralyq kólik baǵytyn damytý jónindegi aýqymdy jobany atap ótti. Qurylystyń qazaqstandyq jáne qytailyq ýchaskeleri aiaqtaldy. Jumystyń Resei jaǵynda aiaqtalýy kútilýde.
Qazaqstan tarapy «Meridian» avtomobil joly jobasynyń jalǵasy retinde Aqtóbe qalasynan Resei shekarasyna deiin Oral qalasy arqyly Samaraǵa deiingi avtojol ýchaskesin qaita jańartýdy kózdep otyr. Qozǵalys qarqyndylyǵynyń artýyna qarai, ýaqyt óte kele 2025-2030 jyldary jol sanatyn 4 jolaqqa deiin keńeitý josparda bar.
Buǵan qosa Qazaqstan men Resei arasyndaǵy áýe qatynasyn retteý máselesine erekshe kóńil bólindi. Qazirgi ýaqytta kórshi elder arasynda 21 baǵyt boiynsha aptasyna 54 reis oryndalyp jatyr. Jalpy, reister birtindep qalpyna kelýde. Alaida, qajetti suranysqa tolyǵymen sai kelmei otyr.
Sonymen qatar Á. Smailov pen M. Mishýstin Qazaqstannyń soltústik jáne shyǵys óńirlerin, onyń ishinde Resei Federatsiiasynan keletin qubyr arqyly gazdandyrý joldaryn talqylady.
«Gazprom» jáne «QazaqGaz» kompaniialary biylǵy jyldyń birinshi toqsanynyń sońyna deiin Qazaqstannyń soltústik jáne shyǵys óńirlerin gazdandyrý jobasyna baǵalaý júrgizýi tiis. Taraptar gaz qubyrlaryn salý baǵyttary men tutyný kólemin anyqtaidy. Á. Smaiylov qysqa merzimdi perspektivada naqty sheshim qabyldaý úshin osy saladaǵy jumystardy jandandyrý qajet ekenin jetkizdi.
Óz kezeginde Mihail Mishýstin Eýraziialyq ekonomikalyq odaq formatyndaǵy integratsiialyq bailanystardyń nyǵaiýyna jáne ózara qyzyǵýshylyqtarǵa sáikes saýda-ekonomikalyq yntymaqtastyqty qamtamasyz etýge senim bildirdi.
«Resei men Qazaqstan arasyndaǵy saýda-ekonomikalyq yntymaqtastyǵymyz tabysty damyp kele jatqanyn atap ótkim keledi. 2021 jyly taýar ainalymy 2020 jylmen salystyrǵanda úshten birge artyp, $25 mlrd-tan asty. Bul bizdiń tarihymyzdaǵy ózara saýdanyń rekordtyq kórsetkishi», — dedi Resei Úkimetiniń basshysy.
Kezdesý sońynda qazaqstandyq jáne reseilik taraptardyń ókilderi Resei Federatsiiasynyń Úkimeti men Qazaqstan Respýblikasynyń Úkimeti arasyndaǵy Ekonomikalyq yntymaqtastyqtyń 2021-2025 jyldarǵa arnalǵan keshendi baǵdarlamasyn iske asyrý jónindegi is-sharalar josparyna qol qoidy.
