QR Premer-Ministri Álihan Smaiylov pen QHR Memlekettik keńesiniń Premeri Li Ketsian beinekonferentsbailanys rejiminde ótken ekijaqty kelissózder barysynda Qazaqstan-Qytai yntymaqtastyǵyn nyǵaitýdyń ózekti máselelerin talqylady, - dep habarlaidy "Ult aqparat" Úkimet basshysynyń baspasóz qyzmetine silteme jasap.
Atap aitqanda, saýda-ekonomikalyq jáne kólik-tranzittik salalarda, energetika, mashina jasaý, aýyl sharýashylyǵy, ekologiia, týrizm, qarjy sektory jáne innovatsiialyq tehnologiialar salasyndaǵy ózara is-qimyl máseleleri qozǵaldy.
Óz sózinde Álihan Smaiylov ótken jyldyń qorytyndysy boiynsha Qazaqstan men Qytai arasyndaǵy taýar ainalymynyń kólemi 14%-ǵa artyp, $18 mlrd-qa jetkenin atap ótti. Sonymen qatar biyl aitarlyqtai ósim tirkelip otyr, 10 aida bul kórsetkish shamamen 33%-ǵa ósip, $19,7 mlrd-ty qurady.
«Memleketter basshylary 2030 jylǵa qarai taýar ainalymyn $35 mlrd-qa deiin ulǵaitýdy maqsat etip qoidy. Biz qytailyq áriptesterimizben birge osy aýqymdy mindetti iske asyrýǵa daiynbyz», — dep atap ótti Premer-Ministr.
Onyń aitýynsha, jetkiziletin taýarlar men qyzmetterdiń nomenklatýrasyn odan ári keńeitý, sondai-aq eki eldiń isker toptary arasynda tikelei bailanys ornatý qajet. Atap aitqanda, Qazaqstan oń saýda trendin nyǵaitýǵa jáne Qytaiǵa 135 taýar pozitsiiasy boiynsha óz óniminiń eksportyn ulǵaitýǵa daiyn.
Yntymaqtastyqtyń basqa da basym baǵyttary retinde Álihan Smaiylov munai-gaz sektorynda jáne mashina jasaýda jańa jobalardyń iske qosylýyn, temirjol júk tasymaldaryn damytýdy, onyń ishinde Qazaqstan men Qytai arasyndaǵy úshinshi temirjol ótkizý pýnktin ashýdy, sondai-aq shekaradaǵy avtomobil ótkizý pýnktteri jumysynyń tiimdiligin arttyrýdy atap ótti.
Sonymen qatar Premer-Ministr qazaqstandyq aýyl sharýashylyǵy ónimderiniń eksporty úshin kedergilerdi alyp tastaýdyń, jolaýshylar aviareisteriniń sanyn arttyrýdyń jáne transshekaralyq ózenderdi paidalaný men qorǵaý jónindegi ózara is-qimyldy jandandyrýdyń mańyzdylyǵyn aitty.
«Biz belsendi dialogqa daiynbyz. Qazaqstan-Qytai strategiialyq áriptestiginiń joǵary dinamikasy barlyq baǵyttar boiynsha damitynyna senimdimin», — dedi Álihan Smaiylov.
Óz tarapynan Li Ketsian Qytai Qazaqstandy dostyq bailanystaǵy kórshiles el jáne mańyzdy saýda seriktesi retinde qarastyratynyn atap ótti. Onyń aitýynsha, QHR júkterdi jáne aýyl sharýashylyǵy ónimderin jetkizýdi ulǵaitýǵa, energetika salasyndaǵy jańa jobalardy iske qosýǵa, sondai-aq gýmanitarlyq bailanystar men qorshaǵan ortany qorǵaý salasyndaǵy ózara is-qimyldy damytýǵa erekshe qyzyǵýshylyq tanytyp otyr.
«Biz qazaqstandyq áriptesterimizben birlesip, elder arasyndaǵy ekijaqty qatynastardy nyǵaitý úshin jumys isteýge daiynbyz», — dedi Li Ketsian.
