.jpg)
QR Premer-Ministri Álihan Smaiylov Úkimettiń Tsifrlyq keńsesinde QR Prezidenti Qasym-Jomart Kemeluly Toqaevtyń osy jyldyń basynan beri bergen tapsyrmalaryn iske asyrý jóninde keńes ótkizdi, dep habarlaidy "Ult aqparat" primeminister.kz saityna silteme jasap.
Áleýmettik mańyzy bar azyq-túlik taýarlarynyń baǵasyn turaqtandyrý jáne jastardy jumyspen qamtý máseleleri qaraldy.
Áleýmettik mańyzy bar azyq-túlik ónimderi baǵasynyń eń kóp ósimi elordada – 1,5%-ǵa, Aqmola oblysynda – 1,4%-ǵa, Aqtóbe oblysynda – 1,1%-ǵa jáne Jambyl oblysynda – 1%-ǵa tirkeldi.
Úkimet basshysy atalǵan óńirler ákimdikteriniń, sondai-aq Aýyl sharýashylyǵy ministrliginiń halyqty qoljetimdi baǵada áleýmettik mańyzy bar azyq-túlik taýarlarymen qamtamasyz etý jónindegi jumysyn synǵa aldy.
«Ákimder men Aýyl sharýashylyǵy ministrligi turaqtandyrý qorlarynyń minimaldy kólemin qalyptastyrǵan joq, “ainalym shemasy” boiynsha jetkilikti qarajat bólinbegen, saýda ústemelerine baqylaý nashar júrgizilgen. Is júzinde, áleýmettik mańyzy bar azyq-túlik taýarlary baǵasynyń ósýin tejeý jumysy birizdi atqarylyp jatqan joq. Sizderdiń mindetterińiz – halyqqa birinshi kezekte qajetti taýarlardy qoljetimdi baǵada qamtamasyz etý», — dep atap ótti Smaiylov.
Premer-Ministr ortalyq memlekettik organdar men ákimdikterge azyq-túliktiń árbir ataýy boiynsha baǵany baqylaýdy kúsheitýdi, turaqtandyrý qorlarynda qajetti kólemdi qamtamasyz etýdi jáne «ainalym shemasyna» qosymsha qarjy bólýdi tapsyrdy.
«Baǵa belgileý tizbegin tergeý jónindegi óńirlik komissiialardyń jumysyn kúsheitip, bólshek saýda nysandarynyń saýda ústemesiniń ruqsat etilgen mólsherin saqtaýyn qadaǵalańyzdar», — dedi Álihan Smaiylov.
Úkimet basshysy jastardyń jumyssyzdyq deńgeiin tómendetý maqsatynda Eńbek jáne halyqty áleýmettik qorǵaý ministrligine Ulttyq ekonomika jáne Qarjy ministrlikterimen birlesip, «Jastar praktikasy» jáne «Alǵashqy jumys orny» jobalaryna qatysý uzaqtyǵy men eńbekaqy mólsherin ulǵaitý múmkindigin qarastyrýdy tapsyrdy.
Atalǵan jobalar boiynsha eńbekaqy mólsherin 20-25 AEK-ten 30 AEK-ke deiin arttyrý kózdelgen. «Jastar praktikasynyń» merzimi 6 aidan 12 aiǵa deiin, «Alǵashqy jumys orny» jobasy 12 aidan 18 aiǵa deiin uzartylady.
«Jastardy oqytý, kásiptik baǵdarlaý jáne jumysqa ornalastyrý máselelerine kóbirek kóńil bólý qajet. Tiisti tarmaqtar Úkimettiń 2022 jylǵa arnalǵan is-qimyl baǵdarlamasyna engiziledi», — dep atap ótti Premer-ministr.
