2022 jyly densaýlyq saqtaý salasyna bólinetin qarajat 50 paiyzǵa artady. Bul týraly QR Premer-ministriniń birinshi orynbasary Álihan Smaiylov aitty, dep habarlaidy QazAqparat.
Senattyń jalpy otyrysynda depýtat Sultanbek Mákejanov Mindetti áleýmettik meditsinalyq saqtandyrý júiesin engizý halyq úshin bazalyq meditsinalyq qyzmetterdiń qoljetimdiligin kezeń-kezeńimen arttyrýǵa múmkindik bergendigin aitty.
Onyń aitýynsha, qaralyp otyrǵan «2022-2024 jyldarǵa arnalǵan respýblikalyq biýdjet týraly» zań jobasynda osy salaǵa arnalǵan 3 jyldyq biýdjet 537 mlrd 888 mln teńgege azaitylǵan. Sonymen qatar senator 3 jyldyq biýdjette meditsinalyq kómektiń kepildik berilgen kólemine arnalǵan shyǵystar somasy da azaitylyp qarastyrylǵanyn jetkizdi. Mysaly ol shyǵystar 2021 jyly – 1 mlrd 333 mln teńge bolsa, 2022 jyly – 1 mlrd 211 mln teńge.
«Osyǵan orai salany qarjylandyrýdyń tómendeýi, halyqtyń jeńildik sanaty bar adamdar bóligine qalai áser etedi? Memleket basshysynyń meditsina qyzmetkerleriniń jalaqysyn kezeń-kezeńimen arttyrý jónindegi tapsyrmasy qalai iske asyrylady?», - dep surady ol Úkimet basshysynyń birinshi orynbasary Álihan Smaiylovtan.
Suraqqa jaýap bergen birinshi vitse-premer densaýlyq saqtaý júiesin qarjylandyrý óte mańyzdy másele ekendigin atap ótti.
«Pandemiianyń aldynda, 2019 jyly densaýlyq saqtaý salasyna 1,2 trln teńge bólinse, kelesi jyly bul salaǵa 1,8 trln teńge bólinedi. Iaǵni, 2 jyldyń ishinde densaýlyq saqtaý salasyna bólinetin qarjy 50 paiyzǵa ósip otyr. Bul ósim osy saladaǵy memlekettiń barlyq mindettemelerin tolyq oryndaýǵa múmkindik beredi. Onyń ishinde meditsina qyzmetkerleriniń jalaqysyn 2,5 esege kóterý, meditsina salasynda jańa nysandar salý, bastalǵandaryn aiaqtaý, meditsinalyq-sanitarlyq alǵashqy kómek pen Mindetti áleýmettik meditsinalyq saqtandyrý júiesin qarjylandyrý, sanitarlyq-epidemiologiialyq is-sharalardy iske asyrýǵa múmkindik beredi. Sonymen birge memlekettiń áleýmettik saladaǵy mindettemelerin kúrt ósirýge jol bermeý kerek dep oilaimyz. Sondyqtan 3 jyldyq biýdjet josparlanǵan kezde halyqtyń 15 sanaty boiynsha Áleýmettik meditsinalyq saqtandyrý qoryna bólinetin qarajaty eseptegende halyqtyń median jalaqysyn esepke aldyq. Bul kórsetkish halyqtyń naqty ortasha tabysy kórsetedi», - dedi Álihan Smaiylov.
