Búgin Londondaǵy 20 myńdyq O2 arenasynda WBA (Super), IBO, WBC jáne IBF tujyrymy boiynsha orta salmaqtaǵy álem chempiony, qazaqstandyq Gennadii Golovkin britandyq Kell Brýkty besinshi raýndta tehnikalyq nokaýtpen utyp, óz ataǵyn qorǵap qalǵan bolatyn. Osy jekpe-jekti júrgizgen Sky Sports-tyń kommentatory: «5 jyldyq kareramda Londonda mundai kásibi boks jekpe-jegin kórgem joq» dep aitypty. Bul týraly jýrnalist Ǵalym Boqash óziniń feisbýktegi paraqshasynda jazdy.
«Sky Sports-tyń kommentatory: «5 jyldyq kareramda Londonda mundai kásibi boks jekpe-jegin kórgem joq» dep saldy. Buǵan deiin jeńilip kórmegen Kell Brýkti barlyq ulybritaniialyq kommentatorlar men sarapshylar alǵashqy raýndtarda qarsy shabýyl jasap, áigili qarsylasyna birneshe soqqy darytqany úshin kótermelei sóilep jatty. Biraq qazaqstandyq pancherdiń teńdessiz ekenin, eshqashan sheginbeitinin, anaý-mynaý soqqyǵa basynyń qozǵalmaitynyn, distantsiiany jaqsy ustaitynyn, eseppen ólshep joiqyn uratynyn únemi aýditoriianyń esine salýmen boldy. Transliatsiianyń sońyna qarai sarapshylar Brýk nokaýtqa ketpeýi úshin ǵana bapkerleri jekpe-jekti erte úzip tastaýǵa májbúr bolǵanyn moiyndady:) Sky Sports - shoý uiymdastyrýdyń sheberi. Artyq dańǵaza joq. Júrgizýshiler minsiz, tanystyrý, ringtegi qimyl-qozǵalys, jaryq túsirý, efir rejissýrasy óte saýatty túrde sekýndyna deiin eseptelgen. Onysyna raqmet», – dep jazady Ǵalym Boqash.
Aita keteiik, Golovkin osymen óziniń 36-shy kezesýinde jeńiske jetip otyr. erlesimiz osy jeńisi úshin 3 million fýnt sterling (4 million dollar) gonorar aldy. Sol sekildi Brýkte dál osyndai tabysqa keneledi. Bul rekordtyq soma. Buǵan deiin Golovkin eń kóp tabysyn Dominik Ýeid pen David Lemege qarsy ótkizgen jekpe-jekterinde alǵan. Ol kezde gonorar kólemi – 2 million dollar bolǵan edi.
Jýrnalist sonymen qatar osy kezdesýge qatysty óziniń jeke pkirin bildirip, Gennadii Golovkin álem deńgeiindegi kásipqoi bokstyń fenomeni ekenin taǵy dáleldedi dep otyr.
«Orta salmaqtaǵy IBF, IBO jáne WBC chempiondyǵyn qorǵap qalý boiynsha ótken jekpe-jekke qatysty jeke pikir aitar bolsam, Gennadii bes-aq raýndqa sozylǵan básekeniń basynda aýyr qozǵalǵandai, denesi ashyq qalǵandai kórindi. Úshinshi raýndta apperkot jiberip alǵanda mazasyzdana bastadym. Biraq qaitalaýdan kórgende Kell Brýktiń soqqysy taza shyqpaǵanyn, sol sebepti Gennadiidi eseńgirete almaǵanyn baiqadym. Menińshe, aldyńǵy qarsylastarymen salystyrǵanda Brýk Golovkinge birneshe ótimdi soqqy jasai aldy. Biraq qýaty az soqqylar ma deimin. Gennadii jekpe-jektiń sońynda bergen suhbatynda «Sezgen de joqpyn» dep jaýap berdi. Rasynda da solai siiaqty. Besinshi raýndta Golovkin djeb pen krosty qoiyp, hýk pen svingke kóshti. Syrt kózge qimyly baiaý kórinýi múmkin, biraq Gennadii temir mashina siiaqty boksshy. Kóz aldyńyzǵa aqyryn ǵana ainalyp turǵan alyp bolat kolenvaldy elestetińizshi. Aldyna qoiǵan zatty baiaý ǵana sipap ótkendei bolady, biraq shyn máninde janshyp, maiyryp jiberedi. Golovkinniń qoldary sondai kolenval siiaqty. Tigen jerin oiyp túsiredi. Oǵan búgin Londondaǵy O2 Arenaǵa jinalǵan hám tikelei efirge kóz tikken jankúierler taǵy bir kýá boldy. "Oń kózimniń asty jyrylyp ketti, áitpese 12 raýnd bokstasýshy edim" dep jatty Brýk. Oǵan biz de, jergilikti jankúierler de sengendei túr jasadyq:) Ádilin aitý úshin Kell Brýktiń GGG-men judyryqtasý úshin jartylai orta salmaqtan orta salmaqqa ótken júrektiligin atap ótý kerek. Al Gennadii Golovkin álem deńgeiindegi kásipqoi bokstyń fenomeni ekenin taǵy dáleldedi. Jeńis qutty bolsyn!», – dep jazady jýrnalist.
