Kókshetaýda janarmai quiǵannan keiin birden isten shyqqan kólikterge qatysty shý shyqty. Júrgizýshilerdiń aitýynsha, Zerendi tasjoly baǵytyndaǵy janarmai quiý beketine toqtap, benzin quiǵan soń birqatar kóliktiń qozǵaltqyshy óship, jolda qalyp qoiǵan, dep habarlaidy ult.kz.
Áleýmettik jelide taraǵan videoda júrgizýshilerdiń qalypty jaǵdaida janarmai quiǵannan keiin kólikteri júrmei qalǵanyn aityp shaǵymdanǵany kórinedi. Kýágerlerdiń málimetinshe, 20-dan astam kólik toqtap qalǵan. Keibir júrgizýshiler kólikterin jol boiynda qaldyryp, qalaǵa jaiaý qaitýǵa májbúr bolǵan.
Oqiǵaǵa qatysty Kókshetaý qalasy ákimdiginiń kásipkerlik jáne aýyl sharýashylyǵy bólimi túsinikteme berdi.
Ákimdik málimetinshe, janarmai quiý beketiniń basshylyǵy usynǵan aqparat boiynsha, sapasyz janarmaidan zardap shekken bolýy múmkin 15 kólik anyqtalǵan.
«Atalǵan kólikterdiń barlyǵy janarmai júiesin tazartý jumystaryn júrgizý úshin tehnikalyq qyzmet kórsetý stantsiialaryna jiberildi. Kólik ielerine janarmai quiý beketi basshylyǵynyń keltirilgen shyǵyndy óteý jónindegi mindettemelerin rastaityn kepildik hattar berildi», – delingen ákimdik habarlamasynda.
Osylaisha, zardap shekken júrgizýshilerge keltirilgen shyǵyndy óteýge ýáde berilgen. Al janarmai sapasyna qatysty máseleniń naqty sebebi týraly aqparat ázirge habarlamada kórsetilmegen.
