Qostanaida politsiianyń toqtaý talabyna baǵynbai qashqan júrgizýshi jol apatynan qaza tapty. Avtobýsta bolǵan eki jolaýshy meditsinalyq kómekke júgindi, dep habarlaidy ult.kz.
Sputnik Qazaqstannyń málimetinshe, Qostanaida politsiiadan qashqan kólik júrgizýshisi avtobýspen soqtyǵysyp, oqiǵa ornynda kóz jumdy.
Resmi málimetke sáikes, qaiǵyly oqiǵa 25 qazan kúni keshki ýaqytta bolǵan. Júrgizýshi politsiianyń kólikti toqtatý týraly talabyna baǵynbai, qashyp ketken.
Qashý kezinde ol qiylysta baǵdarshamnyń qyzyl túsine ótip, avtobýsqa soqtyǵysqan. Soqqydan jeńil kóliktiń júrgizýshisi oqiǵa ornynda kóz jumdy.
Apat kezinde avtobýsta 55 jolaýshy bolǵan. Olardyń ekeýi meditsinalyq kómekke júgindi.
Qazir politsiia oqiǵanyń mán-jaiyn anyqtaý úshin tergeý sharalaryn júrgizip jatyr.
