Soltústik Qazaqstan oblysynyń aýmaqtyq kartasy (Kórneki sýret).
Soltústik Qazaqstan oblysyndaǵy (SQO) Sergeev sý qoimasynda sý búgin tańerteń qalypty deńgeiden 2,9 metrden asyp turdy, - dep habarlady Azattyqqa oblystyq tótenshe jaǵdailar departamentiniń (TJD) baspasóz hatshysy Evgenii Jýravlev.
Bir kún buryn Esil ózenine salynǵan Sergeev qoimasyndaǵy sý qalypty deńgeiden úsh metr asyp turǵany habarlanǵan edi. Oblys ákimi Qumar Aqsaqalov 18 sáýirde jýrnalisterge syiymdylyǵy 693 million tekshe metr bolatyn sý qoimasynda sý syiymdylyǵynan 64 paiyzǵa kóp ekenin aitqan.
TJD keshe aldaǵy birneshe kúnde Esil ózeniniń ańǵarlary arqyly kóp kólemde sý júrýi múmkin ekenin eskertken.
Bul sý qoimasyna qatysty sý sharýashylyǵy jónindegi memlekettik mekemeniń oblystyq filialynan aqparat alý múmkin bolmady. Esil ózeni Qyzyljar, Esil jáne Shal aqyn aýdandarynyń territoriiasymen ótedi. Petropal túbinde ózen ańǵarlarynyń boiynda saiajai massivteri ornalasqan.
TJD aqparatyna qaraǵanda, aidyń basynan beri oblysta júzdegen úi men aýlany sý basqan. Osy aptanyń basynda tótenshe jaǵdailar qyzmeti Ǵabit Músirepov aýdany men Aiyrtaý aýdanyndaǵy alty eldi mekende erigen qar sýy kem degende 259 úidi basqanyn habarlaǵan. Ǵabil Músirepov aýdanynda osy apta basynda jergilikti deńgeide tótenshe jaǵdai jariialanǵan.
