Soltústik Qazaqstan oblysyna bir aptadan keiin Qaraǵandydaǵy farmatsevtikalyq keshende shyǵarylǵan «Spýtnik V» vaktsinasy jetkiziledi. Osy kúnge deiin 1025 adam koronavirýsqa qarsy reseilik ekpeni alyp úlgerdi, dep habarlaidy «Ult aqparat».
SQO-nyń bas sanitar dárigeri Áset Jumataev óńirdegi koronavirýs boiynsha jaǵdaidy brifingidete aityp berdi.
«Qańtar aiynyń ortasynan bastap oblysta koronavirýs juqtyrǵandar sany ósip, kúnde ortasha 100-110 jaǵdaidan tirkelip otyrdy. Osyǵan bailanysty karantindik shekteýlerdi qatańdatýǵa týra keldi. Nátijesinde epidjaǵdai turaqtalyp otyr. Ótken aptamen salystyrǵanda aýyrǵandar sany 1,5 esege azaiǵan. Qazir táýligine jańadan orta eseppen 60-62 jaǵdai tirkeledi. SQO – «sary aimaqqa» kirdi», - dedi Áset Jumataev.
Máselen ótken táýlikte SQO-da 68 adamda KVI anyqtalǵan. Qazir juqtyrǵandardyń jalpy sany – 11 568. Aýyrǵandar sanynyń azaiýyna bailanysty 13 aqpannan bastap óńirde bas sanitar dárigerdiń jańa qaýlysy kúshine enedi.
«Birqatar nysannyń jumys isteýine ruqsat berdik. Karantin talaptaryn jeńildetý – oblystan virýs ketti degen sóz emes. Ol bizdiń qasymyzda. Kez kelgen ýaqytta juqtyrýymyz múmkin. Sol sebepti barlyǵyn sanitariialyq talaptardy oryndaýǵa shaqyramyn. Maska taǵý, áleýmettik ara qashyqtyqty saqtaý, halyq kóp júretin jerlerge barmaý, qoldy jii jýý – kúndelikti ádetke ainalǵany jón. Sondai-aq qaýipti virýstan saqtanýdyń taǵy bir tiimdi joly – vaktsina alý. Vaktsina qoiýǵa shaqyrǵan jaǵdaida odan bas tartpai, egilińiz. Bul óz basyńyzdy ǵana emes, jaqyndaryńyzdyń da densaýlyǵyn saqtaýǵa kómektesedi», - dedi SQO-nyń bas sanitar dárigeri.
Mamannyń aitýynsha, oblysqa aqpan aiynyń ekinshi jartysynda Qaraǵandydaǵy farmatsevtikalyq keshende shyǵarylǵan «Spýtnik V» vaktsinasy jetkiziledi. Vaktsina tegin salynady.
SQO densaýlyq saqtaý basqarmasy baspasóz qyzmetiniń málimetinshe, búginge deiin 1025 adam koronavirýsqa qarsy vaktsina aldy. Ekpe egilgenderdiń jaǵdaiy jaqsy.
