Soltústik Qazaqstan oblysy Býlaev qalasynda turǵyn úi órtenip, 3 eresek adam men 4 jasar bala mert boldy, dep habarlaidy "Ult aqparat".
SQO tótenshe jaǵdailar departamenti baspasóz qyzmetiniń málimetinshe, búgin tańǵy saǵat 7.00 shamasynda 112 qyzmetine M.Jumabaev aýdany Býlaev qalasyndaǵy Stepnaia, 31 mekenjaiy boiynsha turǵyn úidiń janyp jatqandyǵy jóninde habar túsedi. Kórshileriniń aitýynsha, baspanada bir otbasy turǵan.
Oqiǵa ornyna órt sóndirýshiler jetken kezde úidiń shatyry jalynǵa oranyp úlgeripti. Kóp uzamai baspanadaǵy gaz ballony jarylyp, úidiń tóbesi opyrylyp tústi.
Órtti sóndirý barysynda órt sóndirýshiler úiden 4 adamnyń denesin alyp shyqty, olar: 1993 jyly týǵan úi iesi er adam, onyń 1992 jyly týǵan áieli, olardyń 2017 jyly týǵan uly jáne áiel adam. Búginde ol áieldiń kim ekendigi anyqtalyp jatyr.
«Órt tolyqtai saǵat 14.00 shamasynda sóndirildi. Úi tutas janyp ketti.
Qazir kelgen shyǵyn mólsheri jáne órttiń neden shyqqany anyqtalyp jatyr.
Qaza tapqandardyń týystarymen psihologtar jumys isteýde», - dedi SQO tótenshe jaǵdailar departamenti basqarmasynyń bastyǵy Dmitrii Rastihin.
Jalpy jyl basynan SQO-da 96 órt bolyp, 15 adam qaza tapty, 9 adam jaraqat aldy. Kelgen materialdyq shyǵyn 27 mln teńgeden artyq.
Dmitrii Rastihinniń aitýynsha, órtterdiń 78 %-y jeke sektorǵa tiesili. Qaza tapqandardyń barlyǵy osy jer úilerdiń turǵyndary.
