Soltústik Qazaqstan oblysyndaǵy kólderde qoldan ottegimen baiytý jumystary júrgizilip jatyr, dep habarlaidy "Ult aqparat".
Balyqtardy qutqarý operatsiiasy aeratsiia tásilimen júzege asyrylady.
Kóldiń betine oiyq jasalyp, sý ottegimen baiytylady.
«Aeratsiia jasaý úshin motorly burǵylar, motosorǵylar, aeratorlar jáne sýdaǵy ottegini ólsheitin aksiometr qajet. Biyl balyqty qutqarýǵa qańtar aiynyń ortasynan bastap kiristik. Qys aiazdy boldy, qar qalyń jaýdy. Kei kólderde muz qabaty 1 metrge deiin jetedi. Onyń ústinde 80 sm-ge deiin jetetin qar jabyndysy bar. Aýa jetpegendikten, ásirese taiaz kólderdegi balyqtar qyrylyp qalýy múmkin», - deidi Sokolov memlekettik mekemesiniń mamany Sergei Briýhov.
Qyzyljar aýdanyndaǵy Prýd kóli – taiaz kólder qatarynan. Aýmaǵy 50 ga alyp jatyr. Munda móńke balyǵy kóp kezdesedi. Qazir kól sýynyń quramyndaǵy ottegi mólsheri nebary 1,2 % ǵana quraǵan. Balyqtardy qutqarý úshin kól ústinde qajetti tehnikamen 8 adam jumys istep jatyr.
«Sokolov memlekettik mekemesiniń rezervinde osyndai 23 kól bar. Oblys boiynsha balyq sharýashylyǵyna jaramdy 500-dei sý qoimasy bolsa, sonyń 300-i jalǵa berilgen. Jalǵa alǵandar aeratsiiany óz kúshterimen júrgizedi. Al, balyqtardyń qyrylýyna jol bergen jaǵdaida olarmen jasalǵan kelisimshart buzylady, jaýapkershilikke tartylady.
Al rezervtik sý qoimalarynda jergilikti atqarýshy organdardyń kómegimen bul jumystar júzege asyrylady. Sýdy ottegimen baiytýǵa jazda osy kólderde balyq aýlaityn balyqshylar da biyl volonter retinde kómek berip jatyr», - deidi SQO tabiǵi resýrstar jáne tabiǵatty paidalanýdy retteý basqarmasynyń bólim jetekshisi Erlan Táshimov.
