SQO Aqqaiyń aýdany Toqshyn mektep-gimnaziiasy akt zalynyń tóbesi jartylai qulaǵan. Oqiǵa 4 sáýirde bolǵan. Zardap shekkender joq. Bul týraly SQO Bilim basqarmasynyń baspasóz qyzmeti ókili aitty, - dep habarlaidy Tengrinews.kz.
Oqiǵanyń aldyn ala sebebi - irgetastyń shógýi jáne shatyrdan sý aǵýy.
"Oqiǵa ornyna ýákiletti organdardyń basshylary bardy. Sondai-aq, mán-jaidy anyqtaý jáne shara qabyldaý úshin arnaiy komissiia quryldy", - dedi SQO Bilim basqarmasynyń baspasóz qyzmeti ókili.
Mektep direktory Kúlshara Hamidýllina oqiǵa týraly aityp berdi.
"Mektep 1965 jyly salynǵan. Eshqashan kúrdeli jóndeýden ótpegen. Biyl jazda 130 million teńgeden asa somaǵa kúrdeli jóndeý josparlanǵan bolatyn. Ózim jumys ornymda boldym, óitkeni men de muǵalimmin. UBT-ǵa daiyndyq boiynsha 11-synypqa keńes ótkizip jattym. Aiǵai-shý boldy, dabyl daýsy shyqty. Árine, men kabinetten shyǵyp, tekserdim. Bul ýaqytta muǵalimder jumys istep jatty: bireý olimpiadaǵa daiyndalyp, bireý kabinette jumys istep jatty. Bárimiz akt zalynda ne bolǵanyn kórýge bardyq. Evakýatsiia júrgizildi, synyp jetekshilerine balalardyń aman-saý ekenine senimdi bolý úshin mekteptiń barlyq oqýshysyn tekserý tapsyryldy. Sol kezde (tóbesi qulaǵan kezde) mektep aýmaǵynda on birinshi synyp oqýshylary boldy. Ata-analar balalardy internat ǵimaratyndaǵy shaǵyn ortalyqtan alyp ketti", - dedi mektep direktory.
Sondai-aq, Kúlshara Hamidýllina oqý orny aýmaǵynda muǵalimder men jas mamandar kezekshilik etetinin aitty.
Mektep-gimnaziiada 293 oqýshy oqidy. Oqiǵa saldaryn joiǵanǵa deiin sabaq onlain-rejimge kóshirildi.
Biyl SQO ákimdigi oqý ornyn jóndeýge qarajat bólgen. Toqshyn mektep-gimnaziiasynyń tóbesin, akt zaly men internat ǵimaratynyń tóbesin aýystyrý josparlanyp otyr.
