Soltústik Qazaqstan oblysynda tártip saqshylary 4,5 tonna artemiia salina shaianyn zańsyz aýlaǵan Taiynsha aýdanynyń turǵynyn ustady, dep habarlaidy "Ult aqparat".
SQO Politsiia departamenti baspasóz qyzmetiniń málimetinshe, Taiynsha aýdanynyń politseileri jáne SQO PD Kriminaldyq politsiia basqarmasynyń qyzmetkerleri birlese reid ótkizgen. Is-shara barysynda tártip saqshylary «ZiL» júk kóligin toqtatty. Kólikten salmaǵy 4,5 tonna artemiia salina shaiany salynǵan 105 qap tabyldy. 1987 jyly týǵan jergilikti turǵyn kóliktegi júkke qatysty qujattardy kórsete almady.
Atalǵan fakti «Urlyq» baby boiynsha Sotqa deiingi tergep-tekserýdiń biryńǵai tizilimine engizildi. Kúdiktige qatysty kelýge mindetteý túrindegi bultartpaý sharasy qoldanyldy. Júk kóligi arnaiy turaqqa qoiyldy.
Shyǵyn somasy ázirge belgisiz. Politsiia qyzmetkerleri oqiǵanyń mán-jaiyn anyqtaýǵa qatysty jumysty bastap ketti.
«Artemiia salina shaiany farmakologiiada qoldanylatyn qundy shikizat. Ol «qara bazarda» suranysqa ie jáne qymbat turady. Sonysymen de kópshiliktiń qyzyǵýshylyǵyn týdyrady. Alaida shaian tárizdi jándikteri bar kólder jalǵa alynǵan. Artemiia salinany urlaý faktileri buryn da tirkelgen. Bul jaǵdai jyl basynan beri Taiynsha aýdanynda shaian tárizdilerdi tárkileýdiń eń iri kólemi bolyp otyr», - deidi aýdandyq politsiia bóliminiń bastyǵy Nurlyjan Aqtanov.
Oblysta ótkizilip jatqan «Brakoner» jedel-profilaktikalyq is-sharasy aiasynda 23 mobildi top quryldy. Tártip saqshylaryna ańshylyq sharýashylyqtardyń qoryqshylary da kóp kómek kórsetedi. Jalpy «Brakoner» is-sharasy bastalǵaly oblysta tabiǵatty qorǵaý zańnamasyn buzýdyń 246 deregi tirkeldi. Negizinen ań aýlaý erejelerin buzýǵa qatysty, iaǵni 208 jaǵdai anyqtaldy. Zańsyz atylǵan 5 ańnyń eti, 8 qarý tárkilendi.
Ekologiialyq qylmystar boiynsha 9 qylmystyq is qozǵaldy.
