Soltústik Qazaqstan oblysynda elevatorǵa qaraqshylyq shabýyl jasap, 170 mln teńgeni urlaǵan kúdikti bir jyldan keiin ustaldy, dep habarlaidy "Ult aqparat".
Esterińizge salaiyq, qaraqshylyq shabýyl byltyr qarasha aiynda Aqjar aýdanynda boldy. «Talshyq Astyq LTD» JShS ǵimaratyna maska kigen 4 adam basyp kirip, sholaq myltyqqa uqsas qarýmen qorqytyp, 170 mln teńgeni alyp ketken.
SQO politsiia departamenti baspasóz qyzmetiniń málimetinshe, kúdiktilerdiń bireýi bir jyldam astam ýaqyt izdeýde boldy. 10 jeltoqsan SQO PD Kriminaldyq politsiia basqarmasy qyzmetkerleriniń astanaǵa qyzmettik issapary barysynda onyń izine túsip, ustady. Qazirgi ýaqytta Kókshetaýdyń 33 jastaǵy turǵyny Nur-Sultan qalasynyń ýaqytsha ustaý izoliatorynda otyr. Bul shabýyl jasaǵan toptaǵy ekinshi kúdikti, birinshisi qańtarda qolǵa túsken bolatyn. Politseiler qazir qalǵandarynyń júrgen jerin anyqtaý maqsatynda jumys júrgizip jatyr.
«Qylmyskerlerdi izdeý – kriminaldyq politsiia bólinisteri jumystarynyń mańyzdy baǵyttarynyń biri. Keide sot tóreliginen qashyp júrgenderdi izdeýge kóp ýaqyt ketedi. SQO-da jyl basynan 47 qylmyskerge izdeý jariialandy. Búginde olardyń 35-i ustaldy, úsheýi qaraqshylyq shabýyl, ekeýi aýyr dene jaraqattaryn keltirgeni, bireýi tonaý, taǵy bireýi esirtki qylmysyn jasaǵany úshin izdeýde boldy.
TMD elderiniń quqyq qorǵaý organdary úshin oblys politseileri 20 qylmyskerdiń júrgen jerin anyqtap berdi. QR tys jerde qylmys jasady degen kúdikpen tórt soltústikqazaqstandyq anyqtaldy», - deidi SQO PD KPB bastyǵy politsiia polkovnigi Piotr Klimov.
